Жил бүрийн намар түрээсийн байрны эрэлт нэмэгддэг. Үүнтэй холбоотойгоор иргэдийг залилах, хууран мэхлэх зэрэг хэргүүд нэмэгдэж байгааг цагдаагийн байгууллагаас удаа дараа анхааруулсаар байна.

Тухайлбал, энэ сарын 8-ны өдөр “Ботаникт байр түрээслүүлнэ” гэх зарын дагуу хоёр ч иргэн залилуулсан хэрэг гарчээ. Иргэн А наймдугаар сарын 8-ны өдөр уг зарын дагуу очиж уулзан нэг өрөө байрны хоёр сарын түрээс болох 1.2 сая төгрөгийн төлбөрөө төлжээ. Гэвч маргааш нь түрээслүүлэгч  өөрийн эд зүйлээ зөөж амжаагүй гэдэг шалтгаанаар оруулаагүй байна. Ингээд хоёр хоногийн дараа А-г түрээсэлсэн байрандаа эд хогшилоо оруулж байх хооронд байрны хаалгыг түгжин, орох боломжгүй болгожээ.

Дугаар руу нь залгахад авахгүй байсан тул орой болтол хүлээх зуураа байрыг нь давхар иргэн Э-д түрээсэлсэн болохыг мэдсэн байна.

Иргэн Э наймдугаар сарын 9-ний өдөр зарын дагуу түрээслүүлэгчтэй уулзаж тэр өдрөө байрныхаа хоёр сарын түрээс болох 1.1 сая төгрөгийг төлөн, байрандаа оржээ. Байрандаа ороход мөн л хаалга нь онгорхой байсан ба лавлан асуухад ухаалаг цоожны зай нь дууссан янзлуулаарай гэжээ.

Ийнхүү байраа давхар түрээслээд зогсохгүй, ор мөргүй алга болжээ. Байраа түрээсэлсэн уг этгээдийг Баянзүрх дүүргийн 8-р хорооны Цагдаагийн 3-р хэлтэст өргөдөл өгч шалгуулсан ч одоогоор олдоогүй байгаа аж.

Энэ мэтчилэн түрээсийн байртай холбоотой луйвар, үл ойлголцол гарч байгаа тул байр түрээслэх гэж байгаа хүмүүст хуулийн зөвлөх Т.Мөнхбат дараах зөвлөмжийг өгч байна. Үүнд,

• Цахим сүлжээнд зар тавьсан хүний фэйсбүүк хаягийн түүхийг шалгах,
• Тухайн байрны үнэ, нөхцөл зах зээлийн үнэтэй таарч байгаа эсэхийг нягтлах. (Ихэнх залилан үйлдэгчид зах зээлээс доогуур үнэ болон боломжийн нөхцөл хэлдэг.)
• Гэрээ хийгээгүй тохиолдолд төлбөрөө шилжүүлж огт болохгүй.
• Гэрээгээ хийхдээ улсын бүртгэлийн гэрчилгээ болон лавлагааг сайтар шалгах.
• Тухайн хүний бичиг баримт дээрх овог, нэр гэрчилгээ, лавлагааны нэртэй таарч байгааг шалгах.
• Түрээсийн гэрээнд гарын үсэг зурахаасаа өмнө бүх зүйл заалт, нөхцөлийг анхааралтай уншиж танилцах нь зүйтэй. Гэрээг уншиж ойлгоход хангалттай хугацаа зарцуулах хэрэгтэй.
• Түрээслэгчийн хүлээх үүрэг, хариуцлагын талаар түрээсийн гэрээнд тодорхой заасан байна. Ойлгохгүй зүйл байвал түрээсийн гэрээнд гарын үсэг зурахаасаа өмнө түрээслүүлэгчээс асуух зэрэг болно.

Г.Халиунаа