Байгаль орчин, уур амьсгалын өөрчлөлтийн сайд Б.Батбаатар Их Британи, Умард Ирландын Нэгдсэн Вант Улсын Уур амьсгалын өөрчлөлтийн асуудал хариуцсан Тусгай элч хатагтай Рейчэл Киттэй уулзжээ.

Тэд уур амьсгалын өөрчлөлт, СОР17-ийн хүрээнд хамтын ажиллагааг өргөжүүлэхээр санал солилцлоо. 

ИБУИНВУ, Европын комисс болон бусад хөгжингүй улс орнуудын зүгээс COP30-ын үеэр "Хатуу түлшнээс татгалзах замаар ногоон шилжилтийг дэмжих замын зураг"-ийг санаачлан батлуулахаар ажиллаж байна. 

Хатуу түлшнээс татгалзаж, цэвэр-сэргээгдэх эрчим хүчний эх үүсвэрийг нэмэгдүүлэх уг санаачилгад манай улсыг нэгдэж ажиллахыг уриалав. Санаачилгын хүрээнд хөгжиж буй улс оронд бодлого, техник, санхүүгийн дэмжлэг үзүүлж ажиллах боломжтойг мөн дурдав.  

ИБУИНВУ-ын зүгээс байгаль олон талт гэрээ хэлэлцээрийн мэргэшсэн хэлэлцээрч бэлтгэхэд Монголд үзүүлж буй дэмжлэгээ үргэлжлүүлэхийн зэрэгцээ, Байгаль орчны мэргэшсэн сэтгүүлч бэлтгэх шинэ хөтөлбөр хамтран хэрэгжүүлэх боломжийг судлахаар тохиролцов. 

ИБУИНВУ COP17 бага хурлын хүрээнд гарах бүхий л санаачилгыг дэмжиж ажиллахаа илэрхийлэн, тэр дундаа олон нийтийг мэдээллээр хангах, мэдээллийн хүртээмжийн талаар хамтын ажиллагааг эрчимжүүлэхээр тогтов гэж БОУАӨЯ мэдээлэв.

Уур амьсгалын өөрчлөлтийн тухай НҮБ-ын суурь конвенцын Талуудын 30 дугаар бага хурлын  (COP30) үеэр Япон улсын павильонд  "Хамтарсан Кредит Олгох Механизмын улсуудын 11 дүгээр уулзалт" боллоо.

Энэ үеэр  Байгаль орчин, уур амьсгалын өөрчлөлтийн сайд Б.Батбаатар Монгол-Японы Хамтарсан кредит олгох механизм (JCM)-ын үр дүнг танилцууллаа.

Тэрбээр "JCM нь манай улсын хүлэмжийн хийн ялгарлыг бууруулах болон ногоон шилжилтийг хурдасгахад бодитой, чухал үүрэг гүйцэтгэж байна.  Монгол Улсын сэргээгдэх эрчим хүчний суурилагдсан хүчин чадал өнөөдөр 323 МВт-д хүрсэн бөгөөд үүний 72.7 МВт буюу 18 хувийг JCM-ийн нарны цахилгаан станцууд бүрдүүлж байна.

Энэ нь JCM-ын хамтын ажиллагаа нь  Япон Улсын хөрөнгө оруулалт, дэмжлэгтэйгээр сэргээгдэх эрчим хүч, эрчим хүчний үр ашигтай шийдэл бүхий байгальд ээлтэй, нүүрстөрөгч багатай технологийг Монгол Улсад түгээн хэрэгжүүлэхэд хувь нэмэр оруулж байгааг харуулж байна. 

JCM нь Парисын хэлэлцээрийн 6.2 дугаар зүйлийн хамтын ажиллагааны арга барилтай бүрэн нийцэж, улс орнуудад NDC зорилтдоо хүрэхэд хамтран ажиллах боломжийг бий болгож байна. Монгол Улс одоо Уур амьсгалын өөрчлөлтийн хуулийн төслийг боловсруулан 2026 онд Засгийн газраар батлуулахаар ажиллаж байна. Энэхүү хуулиар 6 дугаар зүйлийн ил тод байдлыг хангах, давхар тоолохоос сэргийлэх, байгаль орчны бүрэн бүтэн байдлыг баталгаажуулах зарчмыг бүрэн тусгахыг зорьж байна.  

Цаашдын зорилгын хүрээнд бид JCM төслүүдийг өргөжүүлэх, хөрөнгө оруулалтын орчныг сайжруулах, дэвшилтэт технологи нутагшуулах бодлогын урамшууллыг улам боловсронгуй болгоход анхаарч ажиллах болно" гэлээ. 

Танилцуулга мэдээллийн төгсгөлд Монгол Улс JCM төслүүдийг өргөжүүлж, хөрөнгө оруулалт ба дэвшилтэт технологийн орчныг сайжруулах бодлогоо үргэлжлүүлэхээ илэрхийллээ. Мөн ирэх онд Монгол Улсад зохион байгуулагдах COP17-ын бэлтгэлд Япон Улстай илүү нягт хамтран ажиллах хүсэлтэй байгаагаа илэрхийлэв.