УИХ-ын чуулганы пүрэв гарагийн үдээс хойших нэгдсэн хуралдаанаар “Зээлийн хүүг бууруулах хүрээнд авах зарим арга хэмжээний тухай” Улсын Их Хурлын тогтоолын төслийг хэлэлцэж байна.

УИХ-ын гишүүн С.Эрдэнэбат, Монголбанкнаас статистик тоо мэдээлэл аваад үзэхэд 500 сая төгрөгөөс дээш хадгаламжтай иргэд нийт хадгаламжийн 40 хувийг эзэлж байна. Том хэмжээний хадгаламжтай иргэд тусгай гэрээний нөхцөлөөр арилжааны банкуудын хадгаламжийн дунджаас өндөр хүүгээс хадгалуулж буй нөхцөл байна уу. Энэ тал дээр Монголбанк ямар хяналт тавьдаг вэ?

Тэтгэврийн зээлийг төрөөс олгодог ямар ч эрсдэлгүй зээл учир хүүг бууруулах боломж байна уу? Энэ талаар Ерөнхий сайд, Монголбанкны ерөнхийлөгчтэй өнөөдөр уулзаж, шийдэлд хүрсэн гэж ойлгосон.

Монголбанкны ерөнхийлөгч Б.Лхагвасүрэн, Монголбанкны Мөнгөний бодлогын хороо ирэх даваа гарагт хуралдаж, “Тэтгэврийн зээлийг хэрэглээний зээлээс хасъя”  гэдэг саналын томъёоллоор асуудлыг авч хэлэлцэнэ. Тэтгэврийн зээлийн нөхцөлийг хуучин зохицуулалтад нь оруулна. Тэгэхээр дахин тэтгэврийн зээлтэй холбоотой асуудал гарахгүй байх гэж бодож байна.

Ер нь тэтгэврийн зээл гэдэг бүтээгдэхүүн дэлхийд Бразил, Энэтхэг, Индонез зэрэг 4-5-хан оронд байдаг. Тэнд өр, орлогын харьцааг авч үздэг гэв.