Монгол Улсын Ерөнхийлөгчийн 2021 оны ээлжит сонгуульд МАН-ын дарга У.Хүрэлсүхийг дэвшүүлэх нь зүйтэй гэж МАН-ын Бага хурал 100 хувийн саналтайгаар шийдвэрлэсэнийг МАН-ын Байгуулалтын газрын дарга, Тооллогын комиссын дарга  Н.Энхбаатар танилцуулжээ.

МАН-ын Бага хурал өнөөдөр 15.00 цагт хуралдсан. Ингээд намын дарга У.Хүрэлсүхийг олонхын саналаар дэмжин, зургаадугаар сарын 9-нд болох Ерөнхийлөгчийн сонгуульд өрсөлдүүлэх болов. Хурлын эхэнд нэр дэвшигчийн мөрийн хөтөлбөрийг хэлэлцжээ. Ерөнхий сайд асан У.Хүрэлсүхийн зөвлөхөөр ажилласан Ж.Энхбаяр мөрийн хөтөлбөр боловсруулах ажлын хэсгийн ахлагчаар ажиллажээ. Дараа нь МАН-ын Бага хурлын гишүүдийн хэдэн хувийг МАХН-ын гишүүд эзлэх асуудлыг хэлэлцээд санал асуулга явуулжээ.  Бага хуралд өнөөдөр 300 орчим гишүүн оролцож байна.    

У.Хүрэлсүхийн товч намтар

Төгссөн сургууль, мэргэжил

• 1985 онд Нийслэлийн арван жилийн хоёрдугаар дунд сургууль
• 1989 онд Батлан Хамгаалахын Их Сургуулийг Улс төрийн курс,
• 1994 онд Төрийн захиргаа, удирдлагын хөгжлийн институтийг төрийн удирдлагын арга зүйч мэргэжлээр,
• 2000 онд Монгол Улсын Их Сургуулийн Хууль зүйн дээд сургуулийг эрх зүйч мэргэжлээр тус тус төгссөн.

Ажилласан байдал

• 1989-1990 онд Монголын Ардын Армийн 152 дугаар ангид улс төрийн орлогч
• 1991-1994 онд МАХН-ын Төв хороонд улс төрийн ажилтан
• 1994-1996 онд Улсын Их Хурал дахь МАХН-ын Бүлгийн Ажлын албанд зөвлөх
• 1996-1997 онд МАХН-ын Залуучууд Хөгжил төвийн Ерөнхий захирал
• 1997-1999 онд Монголын Ардчилсан Социалист Залуучуудын Холбооны Ерөнхийлөгч
• 1999-2000 онд Улсын Их Хурал дахь МАХН-ын Бүлгийн Ажлын албанд Нийгмийн бодлогын зөвлөх
• 2000-2005 онд Монголын Ардчилсан Социалист Залуучуудын Холбооны Ерөнхийлөгч
• 2000-2007 онд МАХН-ын Удирдах Зөвлөлийн гишүүн
• 2000-2004 онд Улсын Их Хурлын гишүүн
• 2004-2008 онд Улсын Их Хурлын гишүүн
• 2004-2006 онд Засгийн Газрын гишүүн, Онцгой Байдлын асуудал эрхэлсэн сайд.
• 2006-2008 онд Засгийн Газрын гишүүн, Мэргэжлийн Хяналтын асуудал эрхэлсэн сайд
• 2007 оноос Зүүний хүчний холбооны ерөнхийлөгч
• 2008 – 2012 МАН-ын Ерөнхий нарийн бичгийн дарга
• 2012 онд Улсын Их Хурлын гишүүнээр сонгогдсон.
• 2014-2015 Засгийн газрын гишүүн, Монгол Улсын Шадар сайд
• 2016 оноос Засгийн газрын гишүүн, Монгол Улсын Шадар сайд
• 2017 оноос 2021 оны нэгдүгээр сарыг хүртэл Монгол Улсын Ерөнхий сайдаар ажилласан.