#CS2 The MongolZ Thunderpick World Championship 2024 тэмцээнд HEROIC багийг хожин түрүүлснээр аваргын цом, 500 мянган ам.долларын /1.7 тэрбум төгрөг/ эзэн боллоо. Мөн тэд дэлхийн чансааны 5-р байр руу дэвшлээ.

"GAM3RS_X" болон "GRID"-ээс зохиож буй 850 мянган ам.долларын шагналын сантай "Thunderpick World Championship 2024" тэмцээн өндөрлөлөө.

Тэмцээнд урилгаар оролцсон Монголын "The MongolZ" баг финалд Данийн "HEROIC" багийг 3-1 (Dust II 13-8, Ancient 6-13, Anubis 13-11, Mirage 13-2) харьцаагаар хожиж аваргаллаа.

Нийт дөрвөн map-ын шилдгээр багийн ахлагч Бямбасүрэнгийн "bLitz" Гарьдмагнай +18 frag, 88.8 ADR, 1.32 rating-тэй нэрлэгдэв.

• АРВАННЭГДҮГЭЭР САРЫН СПОРТ: Электрон спортын дэлхийн аваргууд болно
• The MongolZ Бразилын багийг хожиж LAN финалын эрхээ авлаа
• "Thunderpick World Championship" тэмцээний B хэсгийг The MongolZ тэргүүллээ

Онлайнаар эхэлсэн тэмцээн хагас шигшээ шатнаасаа Германы нийслэл Берлин хотод болсон бөгөөд "LVL Dome Arena" цэнгэлдэх хүрээлэнд монголын хөгжөөн дэмжигчдийн уухай чанга байлаа.

Хагас шигшээ шатанд Францын "3DMAX" багийг 2-0 (Anubis 13-6, Ancient 13-9) харьцаагаар илүүрхэн финалд шалгарсан Баянбатын "maaRaa" Эрдэнэдалай дасгалжуулагчтай монгол залуус олон улсын "А" зэрэглэлийн тэмцээний хоёр дахь цомоо ийнхүү өргөлөө.

Тэд энэ зун "YaLLa Compass 2024" тэмцээнд түрүүлж 200 мянган ам.долларыг аваад байсан нь авч байсан хамгийн том шагнал нь байв.

The MongolZ ийнхүү Thunderpick World Championship-т түрүүлснээр дэлхийн чансааны 5-р байр руу дэвшлээ.