-Өнгөрч буй долоо хоногт болсон онцлох үйл явдлуудаас тоймлон хүргэж байна-

ЭНХТАЙВНЫ ГҮҮРНЭЭС ТЭМЭЭТЭЙ ХӨШӨӨ ХҮРТЭЛХ ЗАМЫГ ДАХИН ЗАСАХААР ШИЙДЭВ

Энхтайвны гүүрээс тэмээтэй хөшөөний уулзвар хүртэлх авто замыг баасан гаргийн 23 цагаас хааж авто замын засвар шинэчлэлийн ажлыг гүйцэтгэсэн. Энэ явцад авто замын тэгш байдал алдагдаж долгион үүссэн асуудлыг иргэд олон нийтийн сүлжээнд шүүмжилсэн юм.
Энэ асуудлаар Нийслэлийн Замын хөгжлийн газрын дарга Б.Одбаяр "Хугацаа ёсоор дээрх авто замыг 21-ний өдрийн өглөө 06.00 цагт нээх ёстой. Шөнийн цагаар авто зам засварын ажлыг гүйцэтгэж байх хугацаанд цас орсон.

Үүний улмаас авто замын тэгш байдал алдагдаж хэсэг газар долгион үүссэн байдалтай байна. Тиймээс гүйцэтгэгч байгууллага буюу “Трүйроад” компани өөрсдийн хөрөнгөөр дахин засварын ажлыг үргэлжлүүлнэ" гэв. 

"НОГООН АВТОБУС"-НЫ ГЭХ ХЭРГИЙН ШҮҮХ ХУРАЛ ГУРВАН САР ХОЙШИЛЛОО

“Ногоон автобус”-ны гэх хэргийн гэм буруугийн шүүх хуралдааныг анх энэ оны долоодугаар сарын 29-ны өдөр товлосон ч өмгөөлөгчдийн хүсэлтээр хойшилсоор байсан юм. Сүхбаатар, Чингэлтэй, Баянзүрх дүүргийн эрүүгийн хэргийн шүүхэд 2024 оны аравдугаар сарын 21-нд товлосон шүүх хурал мөн л арваннэгдүгээр сарын 6-ны өдрийг хүртэл хойшиллоо.
Тодруулбал, зарим шүүгдэгчийн өмгөөлөгч гадаад улсад мэс засал хийлгэж буй, шүүх хурал давхцан гэх зэрэг хүсэлтийг гаргаж, шүүх хурлыг хойшлуулах хүсэлт ирүүлснийг шүүх хүлээн авав.

Шүүх хуралд Нийслэлийн Засаг дарга асан Д.Сумъяабазар, орлогч Ж.Сандагсүрэн нарыг гэрчээр дуудсан ч ирээгүй байна. Иймд тэднийг шүүх хуралд ирүүлэх арга хэмжээ авахыг хэргийн оролцогчид шүүхээс хүсжээ.

ИМПОРТООР ОРУУЛЖ ИРСЭН АВТОМАШИНД УЛААНБААТАР ХОТЫН
СЕРИТЭЙ ДУГААР ОЛГОХГҮЙ

Арваннэгдүгээр сарын 8-наас импортоор оруулж ирсэн автомашинд Улаанбаатар хотын серитэй дугаар олгохгүйтэй холбоотой асуудлаар Нийслэлийн Засаг даргын нэгдүгээр орлогч Т.Даваадалай болон Тээврийн Цагдаагийн албанаас мэдээлэл өгсөн. 
Нийслэлийн Засаг даргын нэгдүгээр орлогч Т.Даваадалай, Улаанбаатар хотын түгжрэл, агаарын бохирдол, зам тээврийн ослын тоог бууруулах зорилгоор Улаанбаатар хотын нийтийн тээврийн улсын бүртгэлийн дугаарын дээд хязгаарыг тогтоох шийдвэр арваннэгдүгээр сарын 8-наас хэрэгжиж эхэлнэ. Мөн арванхоёрдугаар сарын 1-ний өдрөөс үзлэг оношлогоонд ороогүй тээврийн хэрэгслийг замын хөдөлгөөнд оролцуулахгүй гэсэн юм. Дэлгэрэнгүйг ЭНД дарж уншина уу. 

ИТАЛИ, РУАНДА УЛСТАЙ АГААРЫН ХАРИЛЦААНЫ ХЭЛЭЛЦЭЭР БАЙГУУЛАВ

Олон Улсын Иргэний нисэхийн байгууллагаас зохион байгуулж буй “ICAN 2024” Агаарын хэлэлцээрийн арга хэмжээ энэ сарын 21-25-ны өдрүүдэд Малайз улсын Куала Лумпур хотноо болсон. Энэ хүрээнд ИНЕГ-ын дарга Ч.Мөнхтуяа, Бүгд Найрамдах Итали Улс болон Бүгд Найрамдах Руанда Улсын төлөөлөлтэй агаарын харилцааны хэлэлцээрийг үзэглэж, харилцан ойлголцлын санамж бичгүүдэд гарын үсэг зурсан. 
Итали улсын санамж бичгийг байгуулснаар хоёр улсын хооронд шууд нислэг үйлдэх эрх үүсэж, Италийн Ром, Милан (Мальпенза болон Бергамо), Венец болон 2 цэг тодорхойлохоор тохирлоо. Бүгд Найрамдах Руанда улсын хувьд цэг, давтамж болон багтаамжийг хэлэлцээрийг байгуулах үед тохирно. 

МОНГОЛООС БИЛЬЯРДЫН СПОРТЫН АЗИ АНХНЫ ТИВИЙН АВАРГА ТӨРӨВ

Катар улсын нийслэл Доха хотод хятад пүүл бильярд (Heyball)-ын Ази тивийн аварга шалгаруулах тэмцээн аравдугаар сарын 19-22-ны өдрүүдэд болов. 

Тэмцээнд манай улсаас Э.Тэмүүжин, Б.Нарантуяа, Б.Баттуяа, Э.Ариунцэцэг нар өрсөлдсөнөөс Э.Тэмүүжин алтан медаль хүртэж, Монгол Улсаас бильярдын спортын анхны Ази тивийн аварга төрлөө. 
Э.Тэмүүжин 2016, 2017 онд Америк пүүл бильярдын өсвөр үеийнхний ДАШТ-ээс хошой мөнгөн медаль хүртсэн бөгөөд 2024 оны снукер бильярдын УАШТ-ээс алтан медаль хүртсэн юм. 

ТОМУУГИЙН ҮНДЭСНИЙ ЗӨВЛӨГӨӨН БОЛОВ

Дэлхий дахины болон Монгол Улсын томуу, томуу төст өвчний нөхцөл байдал, өвчлөлийн цаашдын хандлага, эрүүл мэндийн салбарт тулгарч буй хүндрэл, бэрхшээл, салбарын бэлэн байдлыг хангах, томуугийн тандалтыг бэхжүүлэх, үйл ажиллагааны тогтвортой байдлыг хангах талаар хэлэлцэх “Томуугийн үндэсний арваннэгдүгээр зөвлөгөөн” энэ сарын 22-23-ны өдрүүдэд болов. 

Зөвлөгөөнөөс: "Улаанбурхны вакцинжуулалттай холбоотойгоор томуугийн вакцинжуулалт удаарширсан"

Энэ удаагийн зөвлөгөөн Томуугийн үндэсний төв байгуулагдсаны 50 жил, Томуугийн лабораторид суурилсан тандалтын тогтолцоо үүсэж хөгжсөний 20 жилийн ойтой давхцаж буйгаараа онцлог болсон.
Зөвлөгөөнд 21 аймаг, есөн дүүргийн ЭМГ, ЭМТ, НЭ, БОЭТ, өрх, сумын ЭМТ болон төрөлжсөн мэргэжлийн эмнэлэг, тусгай мэргэжлийн төвийн дарга нар, тархвар судлагч, вирус судлагч эмч зэрэг 270 гаруй хүн оролцсон. 

ОНЦЛОХ СУРВАЛЖИЛГА НИЙТЛЭЛҮҮД:

• Д.Бямбасүрэн: Ю.Цэдэнбал гуай нягтлан бодох мэргэжилтэй тул эдийн засаг тайлбарлахад маш амар байв
• Та өнөөдөр хариад хүүхдийнхээ гарыг шалгаад үзээрэй
• Б.Батжаргал: Нислэгийн удирдагчаар сурах 20 оюутны сургалтын төлбөрийг төр хариуцна
• СУРВАЛЖИЛГА: Хариуцлагагүй уул уурхайн ул мөр болж орхигдсон талбайг нөхөн сэргээлээ
• Ричард Буанган: Монголын эрчим хүчний салбарын реформд АНУ туслахад бэлэн