Монголын Үндэсний Худалдаа Аж Үйлдвэрийн танхимаас уламжлал болгон зохион байгуулдаг оны шилдэг аж ахуйн нэгж, салбарын шилдгүүдийг шалгаруулдаг “Энтерпренёр 2024”-ийн шилдэг Инновац нэвтрүүлэгч энтерпренёр номинацид Ньюком группийн дроноор цус, цусан бүтээгдэхүүн зөөвөрлөх төсөл шалгарч, хүрэл меркури цомын эзэн боллоо.

Ард иргэдийн тал хувь нь суурьшсан, авто замын түгжрэл ихтэй Улаанбаатар хотын иргэдэд эмнэлгийн яаралтай түргэн тусламжийн үйлчилгээ авах хүртээмжтэй байдлыг нэмэгдүүлэх зорилгоор хэрэгжүүлж буй энэхүү төслийн ач холбогдол, үнэ цэн, олон улсын шилдэг туршлагыг нэвтрүүлсэн байдал зэргийг үнэлж, энэхүү нэр хүндтэй шагналыг олголоо.

Тус төслийн хамт олон  Цус сэлбэлт судлалын үндэсний төвөөс АШУҮИС-ийн Монгол-Японы эмнэлэг, Амгалан амаржих төрөлжсөн эмнэлэг, Эх хүүхдийн эрүүл мэндийн үндэсний төв рүү нийт 50 удаагийн нислэг үйлдэж, 5 төрлийн 38,259 миллилитр (мл) цус, цусан бүтээгдэхүүнийг амжилттай зөөвөрлөжээ.

Мөн 178 өвчтөнд цус, цусан бүтээгдэхүүн сэлбэсэн бөгөөд үүнээс онцолбол АШУҮИС-ийн Монгол – Японы эмнэлэгт хэвтэн эмчлүүлж байсан биеийн байдал хүнд 2 өвчтөнд яаралтай хэрэгтэй донорын цусыг дроноор хүргэж, цаг алдалгүй тусламж үзүүлснээр 2 өвчтөний амь аварч чадсан билээ.

Энэхүү төслийг хэрэгжүүлэгч Ньюком группийн охин компани болох Монголиан Смарт Дрон Деливери ХХК нь иргэний нисэхийн тухай хууль, иргэний нисэхийн холбогдох дүрмийн хүрээнд заагдсан бүх шалгуур үзүүлэлтийг хангаж, “Хүнгүй агаарын хөлгөөр үйл ажиллагаа эрхлэх зөвшөөрөл” бүхий №01 дугаартай гэрчилгээг Монгол Улсад хүлээн авсан анхны байгууллага болсон юм.

Шинэлэг, хүртээмжтэй, инновацлаг төслийг хамтдаа амжилттай хэрэгжүүлж, технологийн дэвшлийн нэгэн түүхийг хамтдаа бүтээлцсэн хамтрагч байгууллагууд, хамт олондоо баярлалаа.

Ирж буй ондоо хамтын ажиллагааны цар хүрээгээ тэлж, үйл ажиллагаагаа өргөжүүлж, олон улсын шилдэг туршлагаас суралцан, төслөө дараагийн шатанд хүргэх ээлжит аяллаа хамтлаа эхлүүлье.