Улаанбаатар хотын гол нэрийн барааны үнэ 2025 оны хоёрдугаар сарын 17 ны өдрийн байдлаар өмнөх сараас 2.5 хувиар өссөн бол өмнөх 7 хоногоос өөрчлөлтгүй байна гэж Нийслэлийн статистикийн газраас мэдээллээ. 

Улаанбаатар хотод байрладаг, иргэд, олон нийт ихээр үйлчлүүлдэг 13 хүнсний зах, худалдааны төв, супермаркетад ажиглалт хийхэд өмнөх долоо хоногтой харьцуулахад 23 нэрийн барааны үнэ (71.8%) тогтвортой, 4 нэрийн барааны үнэ (12.5%) өссөн, 5 нэрийн барааны үнэ (15.7) буурсан. Үүнд:

Махны дундаж үнэ:
2025 оны 02 дугаар сарын 17-ны өдрийн байдлаар хонины ястай мах нэг килограмм нь дунджаар 16511 төгрөг, үхрийн ястай мах нэг килограмм нь дунджаар 19680 төгрөгийн үнэтэй байна.

Гурилын үнэ:
“Алтан тариа” нэрийн савласан нэг кг гурилын дундаж үнэ дээдийн дээд зэрэг нь 4222 төгрөг, дээд зэрэг нь 3176 төгрөг, 1-р зэрэг нь 2227 төгрөг, 2-р зэрэг нь 1368 төгрөг байна.

Худалдан авагч ихээр үйлчлүүлдэг “Барс” худалдааны төвд “Алтан тариа” нэрийн савласан нэг кг гурилын дундаж үнэ дээдийн дээд зэрэг нь 4200 төгрөг, дээд зэрэг нь 3000 төгрөг, 1-р зэрэг нь 2100 төгрөг, 2-р зэрэг нь 1600 төгрөгөөр тус тус худалдаалагдаж байна.

“Атар” талх хүнсний зах, дэлгүүрт 2470-2800 төгрөгийн үнэтэй байна. “Оргил супермаркет” худалдааны төвд “Атар” талхыг хамгийн хямд буюу 2470 төгрөгөөр, харин “Cаруул” захад 2700 төгрөгөөр худалдаалж байна.

Хүнсний ногооны үнэ:
Өмнөх долоо хоногтой харьцуулахад монгол байцай 1.2 хувиар өсөж 2896 төгрөг, хүрэн манжин 0.8 хувиар өсөж 3767 төгрөг, монгол лууван 1.1 хувиар буурч 2567 төгрөг байна. Харин монгол сонгино, төмсний үнэ тогтмол байна.

Эх сурвалж: Нийслэлийн статистикийн газар