MCS группийн Захирлуудын зөвлөлийн дарга Ж.Оджаргал Хойд америкийн үхрийн аж ахуйн туршлага судлаад явж байна. Тэрээр “Мэтагро” компанийн гүйцэтгэх захирал Б.Солонгын асуултад хариулсан, таван минутын бичлэгийг өнөөдөр олон нийтийн сүлжээнд байршуулав. Бичлэгт:

Б.Солонго: Бид ажлаа хийгээд явж байхад араар хүмүүс кино хийжээ. Үүнд дорвитой хариу өгөхгүй байгаад манай MCS группийнхэн эмзэглэж бухимдаж байна. Дуугүй яваад байхаар буруутай мэтээр ойлгогдож байна. Сүүлийн үед манайхыг их гүтгэсэн. Бид хариу өгөхгүй байх нь буруу юм байна.      

Ж.Оджаргал: Бид урдах ажлаа хийгээд явж байдаг хамт олон. Сүүлийн үед цөөн хэдэн хүн зохион байгуулалттайгаар манай компанийн нэрийг харлуулах гэж хар Пи ар их явууллаа. Бид нийгмийг талцуулж, бужигнуулан, хэрүүл хийхэд хол байя, үүнийг өдөөгөөд яах вэ гэж бодсон. Нэлээн, тэвчээртэй, хүлцэнгүй байсан.

Ийм байхаар буруутай юм шиг буруу ойлголтыг өгөх юм байна. Үүнд харамсаж байна. Зохион байгуулалттайгаар тарааж буй мэдээллийн эсрэг ажиллах сонирхол байдаггүй. Өмнөх ажлаа хийгээд л явж байна. Хүмүүс саруул ухаанаараа ялгаж салгана. Үүнд найдаж хэт хүлцэнгүй байсан.

Ухаа Худагийг 15, 16 жилийн өмнө Засгийн газраас том ажлын хэсэг гарч, дөрвөн сар хэлэлцсэн. Стратегийн ордыг хуулийн дагуу шилжүүлж авсан. Ном дүрмээр нь авсан, бид ямар ч хууль зөрчөөгүй тул би санаа зовохгүй байна.

Бидний тухайн үед төрдөө өгсөн таван тусгай зөвшөөрлийн талбай дээр одоо “ЭТТ” ХК үйл ажиллагаа явуулж байна. Эдгээр таван тусгай зөвшөөрөл нь нийт ордынх нь 95 хувь юм.

Сонгуулиар өгсөн хандивыг хууль бус мэтээр мэдээлж байна. Жагсаал зохион байгуулдаг, тролл армитай гэв. Бид яасан ч завтай юм. Огт хийж байгаагүй зүйлийг бид хийдэг мэтээр ойлгууллаа. Арай л дэндүү гүтгэж байна.

Б.Солонго: Хэдэн үхрийнхээ хойноос явж байтал намайг тролл армитай гэжээ. Би 4000-5000 үхэртэй. Үлгэр домог шиг, хүн итгэх аргагүй. Ийм илт худал мэдээлэлд хүмүүс итгэхгүй гэж бодсон ч газар авах шинжтэй.

Ж.Оджаргал: Гашуунухайтын төмөр замыг хэлэлцээг биднийг эсэргүүцэн, нураах гэж байна гэсэн. Хүмүүс мэдэж байгаа даа, 15 жил энэ төмөр зам холбогдоосой гэж хүсэж байна. Засгийн газрын хийсэн хэлэлцээ их чухал. Төмөр замаар хил холбогдоосой л гэж хүсдэг, үүнд ямар ч эргэлзээ байхгүй.         

Засаг төр тогтвортой байж л эдийн засаг, улс төр хөгжих ёстой. Гадаад, дотоодын хөрөнгө оруулалт, нөү-хауг татах ёстой. Бид Хойд Америкаас яаж хөрөнгө оруулалт татах уу гэж их ажилладаг. Өмнө нь ч Америкаас хөрөнгө татаж байсан. Тус улсын маш том хөрөнгө оруулалтын сан Юнител, Кока Колад хөрөнгө оруулсан.

Ухаа Худагийн толгой компани болох MMC нь олон улсын хөрөнгийн биржид бүртгэлтэй. Энэ ХК-ийн нийт хувьцааны 9 хувийг Америкийн сан, 37 хувийг MCS, үлдсэнийг нь олон улсын сангууд эзэмшдэг. Тэгж байж л хоосон говьд цахилгаан станц, нүүрс баяжуулах үйлдвэр, ажилчдын хотхон, сургууль, цэцэрлэг барьсан. Энэ бүхнийг харлуулж байгаад та бүхэн итгэх хэрэггүй. Олон нийт үнэн худлыг ялгана гээд би тайван байна. Үүнд битгий санаа зовоорой.

Б.Солонго: Цагаан сарын өмнө хар хэрүүл оролцоод яах вэ. Монголчууд амны билгээс ашдын билэг гэдэг. Хавар ирж байхад хэрүүл хийгээд баймааргүй. Дарин дээр давс нэмнэ гэдэг шиг. Гэвч хэр хэмжээнээс хэтрэхээр хэлэхгүй бол болохгүй нь гэж бодлоо.

Ж.Оджаргал: Хуулийн байгууллагад шалгах үед дандаа л шалгуулдаг. Шалгах ч ёстой. Хуулийн дагуу ажилладаг тул санаа зовох хэрэггүй. Та бүхэн сайхан шинэлээрэй.      

ЭНЭ ТАЛААР ХЭН, ЮУ ХЭЛЭВ?

Бүрэн эрхт төлөөлөгч Ж.Батзандан энэ сарын 20-нд хэвлэлийн хурал хийж, “Улсын төсвөөр хайгуул хийсэн ордыг авч банканд барьцаалаад долоон гэр бүл баяжсан. Ухаа Худагийн 34 хувийг төрд авна. Хэлэлцээ хийнэ. Тавдугаар сарын 1 хүртэл хугацаа олгоё. Ж.Оджаргал аа, нүүрсийг чамаас өөр олборлоод зөөх мянга мянган монгол залуус бий" гэсэн юм.