УИХ-ын гишүүд өнөөдөр тангаргаа өргөлөө. Энэ үеэр УИХ-ын гишүүн Ж.Золжаргалаас сэтгүүлчид асуулт асуун хариулт авлаа.

Тэрбээр, Монгол Улс анх удаа 126 гишүүнтэй парламент бүрдүүлж байна. Дотоодын харилцан тэнцвэртэй хяналттай парламент үүсгэх шаардлагатайн үндсэн дээр нийтийн шаардлагаар бий болж буй парламент гэсэн үг. Үүний нэг төлөөлөл болж буйдаа баяртай байна. Хариуцлага мэдэрч байна. Иргэдийн захисан захиасыг төрийн бодлогод тусгуулах үүргээ гүйцэтгэхийн төлөө ажиллана.

-Хамтарсан Засгийн газрын асуудал дээр ямар байр суурьтай байна вэ?
-Албан ёсоор тийм мэдээлэл сонсоогүй. Төрийн онол, зохистой харьцааны хувьд эрх баригч нам эрхээ барьдаг, сөрөг хүч нь байр сууриа хянадаг, зарим тохиолдолд тодорхой зорилгоор эвсдэг үзэгдэл бол байдаг юм билээ. Албан ёсны санал гарч ирсний дараа намууд ярилцаад шийдвэрээ гаргах байх.

-Хот байгуулалт, төлөвлөлтийн тал дээр яаж ажиллахаар зорьж байна?
-Хамгийн том асуудал бол орон байр. Улаанбаатарт хуучны угсармал барилгууд олон бөгөөд үүнийг бодлогын сууриар шийдэх шаардлагатай. Гэр хорооллын бүсийг түр зуур оршин суух бүс гэж харахаа болих хэрэгтэй. Үүнд нийцсэн эрх зүйн орчин, дэд бүтэц, тохижуулалтыг нь шийднэ. Ковидын үед бид дэд бүтэц ямар чухал вэ гэдгийг ойлгосон. Бид үйлдвэрлэлийг хөгжүүлэхийн тулд өрсөлдөхүйц байх шаардлагатай. Үүний тулд татварын зохицуулалт дээр ажиллана гэв.