Улаанбаатар хотын авто замын хөдөлгөөний оргил ачааллын үеэр зуслангийн бүсээс Сүхбаатарын талбай хүртэл, мөн Сүхбаатарын талбайгаас Яармагийн бүс буюу Архивын ерөнхий газар чиглэлд нийтийн тээвэр болон хувийн авто машинаар зорчиход иргэд дунджаар 2-3 цаг зарцуулж байна. 

Улаанбаатар хотод 2030 он гэхэд автомашины дундаж хурд 5 км/цагт хүрч, замын түгжрэлээс үүдэлтэй эдийн засгийн хохирол цаашид нэмэгдсээр байх тооцоолол гарчээ.

Тиймээс “Улаанбаатар трамвай” төслийг хэрэгжүүлснээр 2040 оны түвшинд замын хөдөлгөөнд зарцуулах хугацааны зардлыг хоёр чиглэлд нийлбэр дүнгээр өдөрт 99.22 сая ам.доллароор бууруулах эдийн засгийн үр ашигтай хэмээх урьдчилсан тооцоолол гарсан. 

Төслийг хэрэгжүүлснээр хотын хойд бүс болох зуслангийн бүсийг Сүхбаатарын талбайтай холбох трамвайн шугамаар 29 минут зорчих боломж бүрдэх бол Сүхбаатарын талбайгаас Яармагийн бүс буюу Архивын ерөнхий газар чиглэлд 37 минут зорчих нөхцөл бүрдэх аж.

Төслийн хүрээнд “Улаанбаатар трам” төслийн нэгдүгээр шугамыг Зунжин худалдааны төвөөс Сүхбаатарын талбай хүртэл 11 км урттай, нийт 16 зогсоолтойгоор төлөвлөсөн.

Харин хоёрдугаар шугамыг Сүхбаатарын талбайгаас Архивын ерөнхий газар хүртэл 15 км урттай, 23 зогсоолтойгоор төлөвлөжээ.

Эх сурвалж: Нэгдсэн төслийн удирдлагын газар