Тэргүүн шадар сайд, Эдийн засаг, хөгжлийн сайд Н.Учрал МАН-ын даргад нэр дэвшүүлсэн. Тэрээр МҮХАҮТ-ын дарга Б.Лхагважавтай өрсөлдсөн юм.

МАН-ын 31-р Их хурал өнөө өглөө 09.00 цагт эхэлсэн. Энэ хурал эхэлснээр МАН-ын өмнөх удирдлагуудын ажиллах хугацаа дуусав. Н.Учрал мөрийн хөтөлбөртөө дараах өөрчлөлтийг багтаажээ.      

• Авлига, албан тушаалын хэрэгт холбогдсон намын гишүүдэд улс төрийн дэмжлэг үзүүлэхгүй 
• УИХ-ын сонгуульд намын жагсаалт болон тойргоос нэр дэвшигчдийг бодлогын мэтгэлцээнээр шалгаруулна 
• Тусгаар тогтнолын ордныг хаалттай биш намын гишүүдийн мэтгэлцээний төв болгоно 
• Төрөөс өгдөг намын санхүүжилтийг төв нам дээр татаж аваад байх биш ажил хийж байгаа намын анхан болон дунд шатны байгууллагуудад хуваан өгнө. 
• Жендерийн тэгш эрхийг бүрэн хангана.
• Намын анхан, дунд шатанд ажиллаагүй бол дээшээ дэвшихгүй байх зарчим баримтална.
• Тусгаар тогтнолын ордныг иргэдэд нээлттэй болгоно. 
• Нам дотор шүгэл үлээгчийг хамгаална.
• Ажил хийгээд амьдарч чадахгүй, ажил хийхгүй ч амьдарч болоод байдгийг өөрчилнө. 

МАН-ын 31-р их хурлын уриа эв нэгдэл, шийдэл, хөгжил. 2255 төлөөлөгч Монгол орны өнцөг бүрээс оролцож буй нь улс төрийн түүхэд хамгийн олон төлөөлөгчтэй хуралд тооцогдоно гэж намын гишүүд хэлж байв. 

Одоо нэр дэвшигчдэд өгсөн саналыг тоолж байна.  Нэр дэвшигч Н.Учрал сэтгүүлчдийн асуултад хариулав.

Би хийх ажлаа хэмжигдэхүйц байдлаар танилцуулсан. И4 гэж нэрлэсэн стратегийг хэрэгжүүлнэ. Ардын нам ард түмнээсээ алсарсан байна. Тиймээс ард түмний итгэлийг эргээд олж авах ажлыг эхлүүлэх хэрэгтэй. Гишүүн төвтэй, хариуцлагатай, ил тод нам болно. Улс төрийн намын хуулийг чанд мөрдөнө. Намын дүрмээ хуульд бүрэн нийцүүлнэ.

Цөөн хүний асуудлаас болж 300 мянган гишүүний нэр хүнд унасан. Бид үүнийг үнэлж дүгнэх ёстой.

Би ажлаа намын гишүүдээ сонсохоос эхэлнэ. Намын анхан шатны байгууллагуудтай ажиллана. Үүр, хороо, сумын хуралдаа идэвхтэй оролцдог гишүүд бол ард түмний төлөөлөл. 

Ард түмнээс гадна Ардын намын гишүүд ч шүүмжлэлтэй хандлаа. Нийтлэг эрх ашгаа бод, намын гишүүдээ сонс гэв. Ажилтай, орлоготой, эрүүл монгол хүнийг бүтээнэ гэж намын мөрийн хөтөлбөрт бий. Олон зорилтоо мартаж хэзээ ч болохгүй гэж шүүмжиллээ. Бид үүнтэй санал нэг байна. Тиймээс Ардын нам гишүүдээ, ард түмнээ сонсоно. Алдарсан итгэлийг эргүүлж олж авна. Хариуцлагатай ажиллах болно. Би УИХ-ын дарга болох тухай яриагүй.

Ахмад, дунд, залуу үеийн оролцоог тэгш хангана. Эмэгтэйчүүдийн, оюутны, залуучуудын, ахмадын байгууллагын чадавхыг бэхжүүлнэ. Тооноор орж ирээд нэр дэвшдэг, төрийн ажлын туршлага муутай хүмүүст улс төрийн дэмжлэг үзүүлсэн. Үүнээс болж намын нэр хүнд уналаа. Авлига, ашиг сонирхлын олон хэрэгтэй холбогдлоо.

Цөөн хүний асуудлаас болж 300 мянган гишүүний нэр хүнд унасан. Бид үүнийг үнэлж дүгнэх ёстой. Мөрийн хөтөлбөрийн 72 хувийг Засгийн газрын мөрийн хөтөлбөрт тусгасан. Ард түмэндээ амласан мөрийн хөтөлбөрөө үнэлж чадахгүй байна. Үнэлгээний баг байгуулна.

Мөрийн хөтөлбөр нь хэрэгжээгүй бол тухайн сайдад улс төрийн дэмжлэг үзүүлэхгүй, хариуцлага ярина. Гишүүдийн идэвх оролцооны оноо, ёс зүйн кодтой болгоно. Ёс зүйн ноцтой зөрчил гаргавал оноог нь хасна. Авлига, ашиг сонирхлын зөрчил гаргавал улс төрийг дэмжлэг үзүүлэхгүй гэсэн хатуу зарчим барина. Хаа хаанаа зарчимтай ажиллая. Хариуцлагаа ухамсарлая. Эрхээ эдлэхээ ярьдаг атлаа үүргээ ярьдаггүй. Ийм л болсон. Бүх түвшний хяналтын байгууллагын чадавхыг бэхжүүлнэ. Тэд ёс зүйн хороог ахалдаг. Энэ хороог амьтай болгоно. Ингээд ажиллаад эхлэхээр Ардын намд итгэх итгэл сэргэнэ гэв.