Мягмарсүрэнгийн Бадамсүрэнг Засгийн газрын гишүүн, Хүнс, хөдөө аж ахуй, хөнгөн үйлдвэрийн сайдаар энэ сарын 25-нд томилов.

Тэрээр төрийн удирдлагын менежер, инженер мэргэжилтэй. Улсад 18 жил ажилласан, 2024 оноос Улсын Их Хурлын гишүүнээр сонгогдсон.

Улсын Их Хурлын гишүүд  хөдөө аж ахуй, хөнгөн үйлдвэрийн сайдын албан тушаалд нэр дэвшигчдээс асуулт асууж, хариулт авав. Дархан-Уул аймаг дахь Хүнс, хөдөө аж ахуй, хөнгөн үйлдвэрийн яамны байршлын талаарх байр суурийг нь Ц.Мөнхбат гишүүн лавлаж, Ерөнхий сайдаас хууль дээдлэх зарчмыг баримтлах хүрээнд зарим аймгийн Засаг даргын хууль бус томилгоог хэрхэх талаар тодрууллаа. 

Хүнс, хөдөө аж ахуй, хөнгөн үйлдвэрийн яамыг орон нутаг руу шилжүүлэх шийдвэрийг Улсын Их Хурлын холбогдох тогтоолыг хэрэгжүүлэх хүрээнд гарган, гүйцэтгэсэн гэж үзэж буйгаа М.Бадамсүрэн гишүүн хэлээд тус аймагт ажиллаж буй яамны ажилтнуудтай уулзаж, нөхцөл байдлыг судална гэлээ. 

“Шинэ хоршоо” хөдөлгөөний хүрээнд олгосон 860 тэрбум төгрөгийн зээлийн эргэн төлөлт 4.6 хувийн эргэн төлөлттэй байгааг С.Одонтуяа гишүүнд дурдаад Хүнс, хөдөө аж ахуй, хөнгөн үйлдвэрийн сайдын албан тушаалд нэр дэвшигчээс энэ чиглэлээр ямар арга хэмжээ хэрэгжүүлэх талаар тодрууллаа.

“Шинэ хоршоо” хөдөлгөөнийг дундын хоршоо, логистикийн төв хэлбэрээр хөгжүүлэх саналыг мэргэжлийн байгууллагууд гаргадаг болохыг М.Бадамсүрэн гишүүн дурдаад “Малчдыг бизнес эрхлэгч статусаар нь хөгжүүлэх, зөвлөн туслах үйлчилгээ үзүүлж, хоршоог малын тооноос гадна олсон ашиг, орлогод үндэслэн дэмжих, эдийн засгийн эргэлтийг нь сайжруулах чиглэл рүү боловсронгуй болгон шинэчлэхэд анхаарна” гэв. 

ХХААХҮ-ийн сайд М.Бадамсүрэнгийн товч намтар

ТӨГССӨН СУРГУУЛЬ, МЭРГЭЖИЛ

• ШУТИС, газрын тосны инженер
• Удирдлагын академи, төрийн захиргааны менежмент
• Шинжлэх ухаан технологийн их сургуулийн хүндэт профессор

АЖИЛЛАСАН БАЙДАЛ

• 2001-2002 онд Дорнод аймаг дахь Нефть хангамжийн газрын түгээгч, эрхлэгч
• 2007-2009 онд Магнай трейд ХХК-ийн салбарын дарга
• 2009-2012 онд Дорнод аймгийн Монгол Ардын Намын хорооны дэд дарга
• 2012 оноос Дорнод аймгийн Монгол Ардын Намын хорооны дарга
• 2014-2015 онд Дорнод аймгийн Засаг даргын орлогч
• 2015-2024 онд Дорнод аймгийн Засаг дарга
• 2024 оноос Монгол Улсын Их Хурлын гишүүн
• ШАГНАЛ 2021 онд Алтангадас одон

2024 оны хөрөнгө орлогын мэдүүлэг

Тэрээр өнгөрсөн онд 98 сая төгрөгийн орлого олжээ. Гэр бүлийн орлого нь 49 сая төгрөг болж, өмнөх оныхоос 5 дахин буурсан. Хөрөнгө борлуулж, 659 сая төгрөгийн орлого олжээ.

Нийтийн орон сууц 1, хашаа байшин 1 гэж хөрөнгө орлогын мэдүүлэгтээ бичсэн. Эдгээрээ 1.2 тэрбум төгрөгөөр үнэлсэн. 55 сая төгрөгийн машинтай. 

Эзэмшдэг мал амьтан: Адуу-110, Үхэр-20, Хурдан удмын адуу-22. Эдгээр нь 294 сая төгрөгийн үнэлгээтэй.
Газар: Эзэмших-1га-2, Өмчлөх-3500м2-1, Өмчлөх-699м2-1, Өмчлөх-700м2-1 Үнэлгээ нь 40 сая төгрөг. 
Дотоодын банк, санхүүгийн байгууллага дахь хадгаламж, харилцах данс дахь үлдэгдэл: 77.6сая төгрөг
Бусдаас авах авлагын үлдэгдэл: 80 сая төгрөг
Зээл: 658 сая төгрөг