УИХ-ын чуулганы нэгдсэн хуралдаан эхэллээ. Өнөөдөр УИХ-ын хаврын ээлжит чуулганыг хаах бөгөөд дараах асуудлуудыг хэлэлцэнэ. Үүнд,

• Монгол Улсын Их Хурлын тухай хуульд нэмэлт, өөрчлөлт оруулах тухай хуулийн нэгтгэсэн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Х.Тэмүүжин, О.Цогтгэрэл, А.Ариунзаяа, Б.Бат-Эрдэнэ, Х.Булгантуяа нарын гишүүд өргөн мэдүүлсэн, нэгтгэсэн төсөл, эцсийн хэлэлцүүлэг, асуулт, хариулт 60 минут/
• Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төсөл /Улсын Их Хурлын гишүүн Б.Уянга нарын 2 гишүүн 2025.06.27-ны өдөр өргөн мэдүүлсэн, анхны хэлэлцүүлэг, асуулт, хариулт 60 минут/
• Харьяатын тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төсөл /Улсын Их Хурлын гишүүн П.Сайнзориг нарын 9 гишүүн 2025.06.19-ний өдөр өргөн мэдүүлсэн, анхны хэлэлцүүлэг, асуулт, хариулт 60 минут/
• Төсвийн тогтвортой байдлын тухай хуульд нэмэлт оруулах тухай хуулийн төсөл /Засгийн газар 2025.07.03-ны өдөр өргөн мэдүүлсэн, эцсийн хэлэлцүүлэг, асуулт, хариулт 60 минут/
• Хот байгуулалтын тухай хууль /Шинэчилсэн найруулга/-д нэмэлт оруулах тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Ж.Алдаржавхлан 2025.05.02-ны өдөр өргөн мэдүүлсэн, анхны хэлэлцүүлэг, асуулт, хариулт 90 минут/
• Монгол Улсын 2025 оны төсвийн тухай хуульд өөрчлөлт оруулах тухай, Үндэсний баялгийн сангийн 2025 оны төсвийн тухай хуульд өөрчлөлт оруулах тухай, Нийгмийн даатгалын сангийн 2025 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2025 оны төсвийн тухай хуульд өөрчлөлт оруулах тухай хуулийн төслүүд /Засгийн газар 2025.06.25-ны өдөр өргөн мэдүүлсэн, дөрөв дэх хэлэлцүүлэг/
• “Монгол Улсын 2025 оны төсвийн тухай хуульд өөрчлөлт оруулах тухай хууль баталсантай холбогдуулан авах арга хэмжээний тухай” Улсын Их Хурлын тогтоолын төсөл
• “Монгол Улсын Их Хурлын 2025 оны намрын ээлжит чуулганы хугацаанд хийх төлөвлөгөөт хяналт шалгалтын цаглавар батлах тухай” Улсын Их Хурлын тогтоолын төсөл
• “Монгол Улсын Их Хурлын 2025 оны намрын ээлжит чуулганаар хэлэлцэх асуудлын тухай” Улсын Их Хурлын тогтоолын төсөл
• Монгол Улсын Их Хурлын 2025 оны хаврын ээлжит чуулганы хаалт

Монгол Улсын Их Хурлын тухай хуульд нэмэлт, өөрчлөлт оруулах тухай хуулийн нэгтгэсэн төсөл болон хамт өргөн мэдүүлсэн хуулийн төслүүдийг хэлэлцэж байна. Хуулийн төсөлтэй холбоотой гишүүд үгээ хэлж байна. 

УИХ-ын гишүүн Б.Пүрэвдорж: Түр хороо байгуулж, даргалах эрхийг сөрөг хүчиндээ өгч болохоор хуулийн зохицуулалт орж ирж байна. Өмнө нь 7 удаа түр хороо байгуулсан ч үр дүн гараагүй. Эрх баригч нар өөрсдийн булхайг шалгадаг, дарах зорилготой байгуулсан. Түр хороо байгуулах, даргалах эрхийг сөрөг хүчин авснаар төрийн өмчит компаниудад түр хороо байгуулж шалгалт хийнэ. Өнгөрсөн хугацаанд төрийн өмчит компаниуд ямар ч ашиггүй ажилладаг, хэн нэгэн дарга сайд нарын хүн нь очиж тухайн компанийг өөрийнхөө хувийн компаниас дор байдлаар ажиллаж, идэж уудаг болгосон. Төрийн өмчийн компаниуд чөлөөт зах зээлгүйгээр тусгай эрхтэйгээр бизнесийг давуу эрхтэйгээр хийдэг ч дөнгөж 5 хувийн ашигтай ажиллаж, ихэнх нь ашиггүй ажилладаг. 100 гаруй компанийн 70-аад нь ашиггүй ажиллаж байна. Хувийн компанитай харьцуулахад 3-4 дахин их хүнтэй ч тэдгээр нь өөрсдийн хувийн бизнес, ажлаа хийгээд явж байдаг ийм тогтолцоог сонгуульд ажилласан хүн бүрийг ажилтай болгох зорилгоор хийсэн. Тиймээс дарга нарын савраас төрийн өмчийн компаниудыг салгах, хувьчлах олон нийтийн болгох дэс дараатай ажлыг хийх болно. Түр хороо байгуулах учраас эртхэн савраа салгаарай гэж зөвлөе.