Гадаад харилцааны сайд Б.Батцэцэг Бүгд Найрамдах Финланд Улсад албан ёсны айлчлал хийж байна. Тус улсын Эдийн засгийн сайд Сакари Пуистотой энэ сарын 01-нд  уулзав. 

Уулзалтаар Гадаад харилцааны сайд Б.Батцэцэг  Монгол Улсын улс төр, нийгэм, эдийн засгийн нөхцөл байдал, Засгийн газраас хэрэгжүүлж буй урт болон дунд хугацааны хөгжлийн бодлого, түүнд тусгагдсан томоохон зорилтын талаар танилцуулжээ. 

Хоёр улсын худалдааны эргэлтийг нэмэх, Монголын ноос, ноолууран бүтээгдэхүүнийг Финланд болон Нордикийн орнуудад нийлүүлэх боломжийн талаар санал солилцов. 

Мөн хоёр талын хамтын ажиллагааг Финландын тэргүүлэх салбарууд болох ойжуулалт, ногоон хөгжил, аялал жуулчлал, сэргээгдэх эрчим хүчний салбарт тэлэх, харилцан ашигтай, бодит хамтын ажиллагаа өрнүүлэхэд үр дүнтэй хамтран ажиллахын төлөө байгаагаа илэрхийлэв. 

Энэ сарын 25-26-нд Улаанбаатарт болох “Дэлхийн бизнес эрхлэгч эмэгтэйчүүдийн чуулга уулзалт”-д Финландын аж ахуйн нэгж, бизнес эрхлэгчдийг оролцохыг урьжээ.

“Монгол Улс, Европын Холбооны Бизнес, хөрөнгө оруулалтын форум”-ыг аравдугаар сард Улаанбаатар хотод болох талаар мэдээллээ.