Анхдугаар богд Өндөр гэгээн Занабазарын мэлмий гийсний 360 ойн баяр наадам Өвөрхангай аймгийн төв Арвайхээрт үргэлжилж байна. Өндөр гэгээний наадмын хүчит бөхийн барилдаанд улсын цолтой 64 бөх, улс аймаг, сумын цолтой 240 гаруй бөх, нийт 512 бөх зодоглолоо.

Барилдааны түрүү бөхийн шагналыг Өвөрхангай аймгийн Хужирт сумын харьяат  Монгол Улсын аварга Д.Сумъяабазар ивээн тэтгэж, Ланд Круизер-300 авто машинаар байлж байна. Харин үзүүрлэсэн бөх 70 сая төгрөг, их шөвөгт үлдсэн хоёр бөх тус бүр 35 сая төгрөгийн бай шагнал хүртэнэ. 

Долоогийн даваанд:

• Ховд аймгийн Буянт сумын харьяат Улсын аварга О.Хангай, Хөвсгөл аймгийн Тосонцэнгэл сумын харьяат бөх Улсын арслан Ц.Содномдоржийг,
• Сэлэнгэ аймгийн Цагааннуур сумын харьяат, улсын арслан Б.Орхонбаяр Өвөрхангай аймгийн Төгрөг сумын харьяат Улсын арслан Ц.Бямба-Отгоныг,
• Баянхонгор  аймгийн Жинст сумын харьяат Улсын арслан Э.Батмагнай  улсын харцага О.Наранбаатар амлан авч,
• Ховд аймгийн Зэрэг сумын харьяат Улсын заан Б.Бат-Өлзий, Завхан аймгийн Яруу сумын харьяат Улсын заан Б.Лхагвагэрэл тунаж үлдэн барилдаж эхэллээ. 

Энэ жилийн үндэсний их баяр наадмын түрүү бөх, Улсын шинэ арслан Э.Батмагнай, Улсын аварга О.Хангай нар долоо давж, шөвгийн дөрөвт үлдлээ.

Улсын заан Б.Бат-Өлзий, Улсын заан Б.Лхагвагэрэлээр давж, их шөвгийн дөрөвт үлдлээ. 

Их шөвөгт аварга О.Хангай, арслан Э.Батмагнай, арслан Б.Орхонбаяр, заан Б.Бат-Өлзий нар үлдэж, долоогийн даваа өндөрлөлөө.

Наймын даваа:
Улсын аварга О.Хангай улсын арслан Б.Орхонбаярыг амлаж, улсын шинэ арслан Э.Батмагнай, улсын заан Б.Бат-Өлзий нар тунаж барилдахаар болжээ. 

Улсын арслан Э.Батмагнай улсын заан Б.Бат-Өлзийгөөр, Улсын арслан Б.Орхонбаяр улсын аварга О.Хангайгаар найм давж, үзүүр түрүү булаалдахаар шалгарч үлдлээ.

Есийн даваа:
Монгол Улсын хоёр залуу арслан есийн даваанд хүч үзэж байна. Сэлэнгэ аймгийн Цагааннуур сумын харьяат Улсын арслан Б.Орхонбаяр 1998 онд төрсөн, 182 см өндөр. 105 кг жинтэй. Түүнтэй барилдаж буй Баянхонгор аймгийн Жинст сумын харьяат Улсын арслан Э.Батмагнай 2001 онд төрсөн, 186 см өндөр, 134 кг жинтэй.

Улсын арслан Э.Батмагнай түрүүлж, улсын арслан Б.Орхонбаяр үзүүрлэлээ. Энэ жилийн Үндэсний их баяр наадамд түрүүлж арслан цол хүртсэн Улсын шинэ арслан Э.Батмагнай баяр наадмын дараах анхны том барилдаандаа түрүүллээ. 



Түрүү бөхийн шагналыг ивээн тэтгэсэн Улсын аварга Д.Сумъяабазар, аав Улсын заан Д.Долгорсүрэн, ээж Х.Пүрэвбадам нарын хамт улсын арслан Э.Батмагнайд цоо шинэ Ланд Круизер-300 авто машиныг хүлээлгэн өглөө. 

Үзүүр бөх Б.Орхонбаярыг 70 сая төгрөг, их шөвөгт шалгарч барилдсан Улсын аварга О.Хангай, Улсын заан Б.Бат-Өлзий нарыг тус тус 35 сая төгрөгөөр шагналаа.  

Фотог: МҮБХ