Хүний эрхийн Үндэсний Комиссын гишүүн Г.Нарантуяа Европын Холбооноос Монгол Улсад суугаа Элчин Сайд бөгөөд Төлөөлөгчийн газрын тэргүүн, хатагтай Ина Марчюлёнитег өнөөдөр /2025.09.04/ хүлээн авч уулзлаа.  

Уулзалтын эхэнд Комиссын гишүүн Г.Нарантуяа Элчин сайд, хатагтай Ина Марчюлёнитед энэхүү уулзалтыг санаачилсанд талархал илэрхийлэв. Мөн тус уулзалт нь хүний үндсэн эрхүүдийн нэг болох шашин шүтэх, эс шүтэх эрхийн хэрэгжилтийг хангах, учирч буй зарим хүндрэл, тулгамдаж буй асуудлыг шийдвэрлэх арга замыг хамтран тодорхойлох зорилготой болохыг онцоллоо.   

Энэ үеэр, Улаанбаатар хот дахь Апостолик тэргүүн Кардинал Жиоржио Маренгогийн Монгол Улс дахь шашин шүтэх, эс шүтэх эрхийн хэрэгжилтийн нөхцөл байдал, шашны байгууллагууд үйл ажиллагаагаа хэвийн явуулахад тулгарч буй бэрхшээлийн талаарх мэдээллийг сонсов. Түүнчлэн шашны байгууллага үйл ажиллагаа эрхлэх зөвшөөрөл авах, бүртгүүлэхэд үүсдэг хүндрэл, шашны байгууллагын шугамаар Монгол Улсад нэвтрэх, оршин суух зөвшөөрөл, визний ангилал, төлбөр хураамж тогтмол бус байдаг нь санхүүгийн дарамт болж байгаа тухай оролцогчид байр сууриа илэрхийлсэн юм.  

Хүний эрхийн Үндэсний Комисс иргэдийн шашин шүтэх, эс шүтэх эрхийг хязгаарлаж буй зарим зохицуулалтыг засч сайжруулах, шашны байгууллагуудад тулгамдаад буй асуудлыг шийдвэрлэхэд хуульд заасан чиг үүргийн хүрээнд төрийн болон орон нутгийн холбогдох байгууллагуудтай хамтран ажиллахад бэлэн гэдгийг илэрхийллээ.   

Уулзалтад Европын Холбооны Монгол Улс дахь Төлөөлөгчийн газрын Улс төрийн зөвлөх М.Ганчимэг, Улаанбаатар хот дахь Апостолик тэргүүн Кардиналын хуулийн зөвлөх Б.Баярмаа болон ХЭҮК-ын Судлагаа, дүн шинжилгээний хэлтсийн дарга С.Тунгалагтамир нар оролцов.

Эх сурвалж: ХЭҮК