Бага тойруугийн орчимд зориулалтын зогсоолд байршуулаагүй мопед, скүүтэрийг өнөөдрөөс эхлэн ачиж эхэллээ. Энэ нь явган хүний зам дээр замбараагүй орхисноос үүдэн явган зорчигчид, тэр дундаа харааны бэрхшээлтэй иргэдэд хүндрэл учрах, гар хөлөө цохих зэрэг эрсдлийг бууруулах зорилготой юм.

Бага тойруугийн 105 байршилд 2,460 ширхэг тэмдэг, тэмдэглэгээ бүхий мопед, скүүтэрийн зогсоол байгуулсан.

НИТХ  скүүтер, мопедын түрээсийн үйлчилгээ эрхэлдэг аж ахуй нэгжүүдтэй удаа дараа уулзаж, насанд хүрээгүй хүүхдэд түрээс олгох боломжгүй байх хязгаарлалт, иргэдийн аюулгүй байдлыг хангах арга хэмжээний талаар зөвлөмж хүргүүлсэн байна.

НИТХ-ын дарга А.Баяр эцэг эхчүүдэд хүүхдийн хараа хяналтаа сайжруулах, осол аваар, зөрчил гарсан тохиолдолд хариуцлага тооцох эрх зүйн орчныг судлахыг цагдаагийн байгууллагад үүрэг болгожээ.

Иргэдийг мопед, скүүтэрээ зөв байршуулж, нийтийн эрх ашгийн төлөө хүндлэлтэй хандаж хэвшихийг уриалж байна.