Боловсролын салбарын 2026 оны төсвийн төсөлд олон нийтийн санал авах танхимын хэлэлцүүлэг болсон билээ. Боловсролын яамнаас танилцуулснаар 2026 оны боловсролын төсвийн төслийг 4,8 их наяд төгрөг буюу батлагдсан төсвөөс 12 хувиар нэмэгдүүлж боловсруулжээ. 

Үүний 4,2 их наяд /нийт төсвийн 88,3 хувийг эзэлж буй/ төгрөг нь урсгал зардал бол 561,7 тэрбум нь хөрөнгө оруулалт юм. Харин төсвийн ерөнхийлөн захирагчийн 2026 оны төсвийн төслийн саналд /хязгаараас давсан санал/ 619,2 тэрбум төгрөг байгаагийн бараг тал нь буюу 390,5 тэрбум төгрөг нь ЕБС-д зарцуулагдаж буй нь хүүхдүүдийн тоо өссөн холбоотой гэв.

Хүүхдийн тооны хувьд төрийн өмчит цэцэрлэгт 234,670 хүүхэд, хувийн цэцэрлэгт 33,524 хүүхэд хамрагдах тооцоотой байна. 

• 5настай 76,380
• 4 настай 71,925
• 3 настай 65,499
• 2 настай 64,486 хүүхэд буюу нийт 268,195 хүүхэд хамрагдана. Энэ нь өмнөх жилээс 3377 хүүхдээр өсөлттэй.

Харин ерөнхий боловсролын сургуульд 2026-2027 онд даруй 30,832 сурагч нэмэгдэж нийт 828,737 хүүхэд болох тооцоо байна. 

• 2022-2023 онд 746 мянга
• 2023-2024 онд 771 мянга
• 2024-2025 онд 797 мянга
• 2025-2026 онд 823 мянга 
• 2026-2027 онд 839 мянга 

ЕБС-д сурах хүүхдийн тоо өссөн мөн 6-9 дүгээр ангийн сурагчдыг Үдийн цай хөтөлбөрт хамруулахтай холбоотойгоор зардал нэмэгджээ. Тодруулбал Үдийн цай хөтөлбөрийн зардал 99,8 хувь бараг 100 хувь нэмэгдсэн. Мөн дотуур байрны үйлчилгээ 5,3 хувь, гүйцэтгэлд суурилсан санхүүжилт 7,6 хувь, тоног төхөөрөмжийн зардал 36,7 хувь, төрийн бус өмчийн СӨБ, ЕБС-т олгох хувьсах зардал 29,5 хувиар тус тус нэмэгджээ. 

2026 оны төлөвлөгөөнд нийт 45 сургууль, 45 цэцэрлэг, 17 дотуур байр шинээр барихаар тусгасан ба энэ нь 1,1 их наяд төгрөг шаардлагатайгаас үүнд Азийн хөгжлийн банкнаас 456 тэрбум төгрөгийг шийдүүлэхээр Сангийн яамтай хэлэлцээрийн түвшинд явж байгаа бол цаана нь үлдэх 692,1 тэрбум шийдвэрлэх шаардлагатай гэсэн. 

Иргэний нийгмийн байгууллагын төлөөлөл, салбарын эрхмүүдийн саналуудаас онцолбол:

“Бүх нийт боловсролын төлөө!” Иргэний нийгмийн үндэсний эвслийн Ерөнхий Зохицуулагч Д.Тунгалаг олон тооны цэцэрлэг, сургуулийн байшин барилга бус боловсрол тэр дундаа багшийн чанар хүртээмжийг сайжруулах, тэгш хамран сургах нөхцөлийг бүрдүүлэх, амьжиргааны түвшин доогуур өрхийн хүүхдүүдэд хүрч үйлчлэх шаардлагатайг хэлж байлаа. 

Харин Боловсролын хамтын ажиллагааны нийгэмлэгийн Гүйцэтгэл захирал Б.Батжаргал төрийн бус өмчийн сургууль цэцэрлэгт олгодог хувьсах зардлыг хүчингүй болгож харин тэр хэмнэлтээ төрийн сургуулиуддаа зарцуулах саналыг дэвшүүллээ. Учир нь төлбөртэй сургуульд төрөөс төсөв өгөх нь зохимжгүй. Жишээ нь 2021 оноос хойш төр хувийн цэцэрлэгт өгдөг хувьсах зардлаа өдгөө 36,4 хувиар, ерөнхий боловсролд олгодог хувьсах зардлыг 51,6 хувиар тус тус нэмжээ.

Боловсролын салбарын төсвийн төсөлд авах асуулга 2025 оны 08 дугаар сарын 14-ний 17:30 хүртэл үргэлжилнэ. Та  https://www.ebudget.edu.mn/ -д хандан саналаа илгээгээрэй.