Дорнод аймгийн Дашбалбар сумын нутаг дахь холимог металлын Улааны ордод үйл ажиллагаа явуулдаг  БНХАУ-ын "Шинь Шинь" уурхайн эдэлбэр газар болон энэ хавийн газарт хятадууд хадлан хадаж, машин машинаар гаргаж буй талаар Дорнод аймгийн сэтгүүлч Л.Дэлгэр 10-р сарын 2-ны өдөр цахим хуудаснаа бичиж, гэрэл зургуудыг нийтэлжээ.

Энэ талаар аймаг, орон нутгийн удирдлагууд мэдэж байгаа эсэх, хаанаас зөвшөөрөл авч хадлан хадсаныг тодруулах шаардлагатай юм. 10-р сарын 3-ны өдөр Дорнод аймгийн Засаг дарга Ш.Ёл тайлбар хийжээ.

Тэрбээр тайлбартаа, Сэлэнгэ аймагт олгосон байгалийн хадлан бэлтгэх газарт Хятад улсын иргэд ажиллаж байна гэсэн мэдээллийн дагуу хяналт, шалгалт хийх ажлын хэсгийг явууллаа.

Өвөлжилтийн бэлтгэл ажлыг хангуулах Монгол Улсын Засгийн газрын 2025 оны 56 дугаар тогтоолд байгалийн хадлан, тэжээл бэлтгэх боломжгүй аймгуудад дэмжлэг үзүүлж ажиллахыг зүүн гурван аймгийн Засаг дарга нарт даалгасан.

Хэрэгжилтийг хангах үүднээс Сэлэнгэ аймгаас Дорнод аймагт хадлан бэлтгэх хүсэлтийг ирүүлсний дагуу Халхгол сумын Засаг даргад албан бичгийг хүргүүлж байгалийн хадлан бэлтгэх боломжоор хангаж ажиллах чиглэлийг өгсөн.

Гэтэл Сэлэнгэ аймагт байгалийн хадлан бэлтгэхэд хуваарилж олгосон газарт Хятад улсын иргэд ажиллаж гэсэн мэдээллийн дагуу аймгийн Хүнс, Хөдөө, аж ахуйн газрын даргаар ахлуулсан ажлын хэсгийг хяналт, шалгалт хийж, зохих арга хэмжээг түргэн шуурхай авч, ажиллуулахаар явуулаад байна.

Зөвшөөрлийг бусдад шилжүүлсэн нь тогтоогдвол хуулийн дагуу арга хэмжээ авч, бэлтгэсэн хадланг орон нутгийн орлогод хураан авах болно гэжээ. 

Дорнод аймгийн Засаг даргын захирамжаар байгуулагдсан ажлын хэсгийн бүрэлдэхүүнд тус аймгийн Бүс нутгийн хөрөнгө оруулалт, төлөвлөлтийн хэлтсийн Хүнс, хөдөө аж ахуйн бодлого хариуцсан мэргэжилтэн болон тус сумын удирдлагууд багтжээ.

Ажлын хэсгийнхэн одоогоор тус нутагт ажиллаж буй бөгөөд ямар дүгнэлт гаргасан, БНХАУ-ын иргэдэд хадлан хадах зөвшөөрлийг хэн олгосныг эргэн мэдээлэх болно.