БГД-ийн байрнуудын нэг орцонд хамт амьдардаг болон хөрш айлуудын хүмүүс халдвар авсан тохиолдол гараад байгаа билээ. Коронавирус агааржуулалтын хоолойгоор дамжин халдварлаад байна уу гэсэн сэтгүүлчийн асуултад ХӨСҮТ-ийн тандалт судалгааны албаны дарга А.Амбасэлмаа:

-БГД-ийн 4-р хорооны 4 орон сууцны гэр бүлийнхэн, хөрш, дээд доод давхрын хүмүүс халдвар авсан. Тус орон сууцууд нь голдоо нэг СӨХ-той, хүнсний дэлгүүр, үйлчилгээний газартай, орц цахилгаан шатанд бие биенээсээ халдвар авах эрсдэл өндөр.

Халдвар агааржуулалт, усны хоолойгоор дамжсан гэх одоогоор судалгаа, баталгаа байхгүй. Амьсгал, агаар дуслын замаар халдвар авах боломжтой бөгөөд бие биетэйгээ хавьтал болсон учраас халдвар авсан гэж үзэж байна. Үүнийг цааш нь үргэлжлүүлэн судална. БЗД-ийн 17-р хороонд амьдардаг хамар хашааны, бие биенийхээрээ орж гардаг хүмүүс халдвар авсан байсан гэсэн юм. 

Дэлхий дахинд агааржуулалтын хоолойгоор дамжин халдвар тархсан тохиолдол нэг бус удаа бүртггэдсэн талаар ЭМЯ-ны ахлах шинжээч Д.Нарангэрэл хэлсэн юм. Тодруулбал, 2020 онд Сингапур улсад ажилчдын байранд агааржуулалтын хоолойгоор дамжин халдвар тархжээ. Мөн Хонконгод нийтийн байранд вирус агааржуулалтын хоолойгоор дамжин халдвар тархсан гэсэн судалгаа бий. Агааржуулалтын хоолойгоор дамжин халдвар тархах өндөр магадлалтай хэмээн дэлхий дахинд үзэж байгаа гэлээ.