“Чингис хаан” үндэсний музей дэх Чингис хааны алтан хөшөө бүхий Их хааны өргөөний нээлтийн ёслол боллоо. Есүхэй баатрын ууган хүү Тэмүүжин 1189 онд  Чингис хаан хэмээх алдрыг хүртэж, хамаг Монгол Улсыг  эрхшээн захирч байсан идэр цагийн түүхэн цаг үеийн хөргийг хөшөөнд дүрсэлжээ. 

Чингис хаан үндэсний музейн оройн дээд есдүгээр давхрын Их хаан өргөөнд монгол нутгийнхаа шижир алт, өв соёлын дээж бүхнийг шингээсэн Чингис хааны хөргийг дэлхийн уран баримлын өлгий нутаг Итали улсын Флоренц хотноо захиалан бүтээлгэж, монгол түмний бахархал хүндлэлийн шүтээн болгон заллаа. Их хааны хөргийг бүтээх санаачилгыг Монгол Улсын Ерөнхийлөгч У.Хүрэлсүх гаргаж, Монголбанкнаас бүрэн санхүүжүүлжээ. 



Хөшөөний загварыг гаргах уралдааныг уран бүтээлчдийн дунд зарласан бөгөөд уран барималч, Төрийн соёрхолт, Урлагийн гавьяат зүтгэлтэн Л.Болдын бүтээл шалгарч, олон уран бүтээлчийн санааг бүтээлд шингээн урлажээ. Их хааны алтан хөрөг 7 метр өндөр. 

Хөшөөг дэлхийн уран баримлын өлгий нутаг Италийн Флоренц хотноо хүрлээр цутгуулж, монгол алтаар өнгөлсөн байна. Их хааны хөрөг 3D уран баримлын гүйцэтгэгчээр Итали улсын хоёр үйлдвэр ажиллажээ. Эхлээд баримлын их загварыг хэвлэж, хүрлээр цутгасны дараа тусгай аргаар алтдах үйл явц өрнөсөн байна. Алтан баримал бэлэн болсны дараа МИАТ компанийн тусгай үүргийн онгоц хоёр удаагийн нислэгээр Их хааны алтан баримлыг тээвэрлэн авчирч, Италийн баримлын үйлдвэрийн уран бүтээлчид угсарч Монгол Улсад хүлээлгэн өгчээ.