Монгол Улсын Ерөнхийлөгч У.Хүрэлсүх Бүгд Найрамдах Чех Улсын Ерөнхийлөгч Петр Павелын урилгаар тус улсад төрийн айлчлал хийж байна. 

Монгол Улс, Бүгд Найрамдах Чех Улсын хооронд дипломат харилцаа тогтоосны 75 жилийн ой энэ онд тохиож буй бөгөөд айлчлалын үеэр хоёр улсын Ерөнхийлөгчийн ивээл дор зохион байгуулж буй “Чингис хаан” (Chinggis khaan) олон улсын үзэсгэлэнг нийслэл Прага хотын “Historical building”-ийн үзэсгэлэнгийн танхимд нээх юм. 

"Чингис хаан" Үндэсний музей, Чехийн Үндэсний музейтэй хамтарсан уг үзэсгэлэнг гуравдугаар сарын 10-ны өдрөөс ирэх зургаадугаар сарын 22-ныг хүртэл дэлгэн үзүүлнэ.

Энэхүү үзэсгэлэнд Монгол Улсаас Чингис хаан Үндэсний музей болон ШУА-ийн Археологийн хүрээлэнгийн нийт 170 дэсийн 698 ширхэг үзмэр, эд өлгийн зүйлийг дэлгэх юм байна.

Чингис хаан Үндэсний музей нь олон улсын хилээр чөлөөтэй нэвтрэх тусгай эрх бүхий, тусгай ариутгал хийсэн зориулалтын сав, хүчил шүлтгүй тусгай баглаа боодлыг үзмэр бүрийн хэмжээнд тааруулан БНСУ-д захиалгаар хийлгэжээ. Мөн үзмэрүүдийг музейд эргэн авчрах хүртэл хариуцах олон улсын даатгалд хамруулан үзмэр эд өлгийн зүйлийг гааль, цагдаа, тагнуул, салбарын хяналт дор Монгол Улсын “Соёлын биет өвийг зөөж тээвэрлэх журам”-ыг баримтлан зөөж тээвэрлэсэн байна. 

Улаанбаатар хотноо өнгөрсөн жилийн зургаадугаар сард "Чингис хаан" Үндэсний музейн захирал, академич С.Чулуун, БНЧУ-ын Үндэсний музейн ерөнхий захирал Михал Лукеш нар “Үзэсгэлэн зохион байгуулах, үзэсгэлэнд үзмэр оролцуулах талаар хамтран ажиллах тухай гэрээ байгуулсан нь ийн биеллээ олж байна.