Нийт 33 хүнийг татгалзаж, 240 хүнийг нэр дэвшигчээр бүртгэсэн талаар өнөөдөр Нийслэлийн сонгуулийн хорооноос мэдээллээ. Тодруулбал, МАН-аас 45 нэр дэвшигчээс дөрвөн хүнийг татгалзсан 41 хүнийг бүртгэсэн, АН-аас 44 нэр дэвшигчээс 2 татгалзаж, 42-ыг нь бүртгэсэн байна.

Иргэн Д.Мөнхбаяр болон Нийслэлийн Ардчилсан намын дарга Т.Батцогт мэдээллийн үеэр Нийслэлийн сонгуулийн хорооны үйл ажиллагааг шүүмжилж ажлын цаг дууссан хойно хэвлэлийн хурал хийж, татгалзсан хүмүүсийн нэрсийг одоо мэдэгдэж буй нь буруу гэв. АН-аас нэр дэвшигч иргэн Д.Мөнхбаярыг ял эдэлж байсан шалтгаанаар нэр дэвшигчээр бүртгэхээс татгалзжээ.

Нэр дэвшигчээр бүртгэсэн хүмүүст есдүгээр сарын 26-ны өдөр нэр дэвшигчийн үнэмлэх олгох юм.

Мөн энэ үеэр Нийслэлийн ардчилсан намаас мэдээлэл хийлээ.

АН-ын гишүүн О.Батханд "Нийслэлийн сонгуулийн хороонд удаа дараа ирэхэд дарга нь байхгүй, ил хуль. Энэ бол тогтолцооны алдаа, нийслэлд гажуудал үүссэн гэдгийг батлах энгийн нэг өдрийн жишээ. Нийслэлийн сонгуулийн хороо АН-ын хоёр нэр дэвшигчийн нэрийг хассан тухайгаа хуулийн хугацаанд нь мэдэгдээгүй, цагийг нь тулгаж байгаа нь энэ хүмүүст алдаагаа засч, материалаа өгөх боломжгүй болгож байна" гэсэн юм.