#Чөлөөтбөх 65 кг жинд Цэвээнсүрэнгийн Цогбадрах мөнгө, 57 кг жинд Батхуягийн Мөнх-Эрдэнэ, 79 кг жинд Олонбаярын Сүлдхүү нар хүрэл медаль хүртэв. Харин 70 кг жинд Төмөр-Очирын Тулга 5-р, 97 кг жинд Ганбаатарын Ганхуяг 7-р байр эзлэв.

Чөлөөт бөхийн 2025 оны Азийн аварга шалгаруулах тэмцээн Йордан Улсын нийслэл Амман хотод үргэлжилж байна.

Тэмцээний эрэгтэй төрлийн таван жингийн барилдаан өчигдөр болж Монголын таван тамирчин барилдсанаас гурав нь медалийн тавцанд зогсов.

Тодруулбал, 57 кг жинд Батхуягийн Мөнх-Эрдэнэ эхний шатанд Афганистаны бөхийг 12-2, шөвгийн наймд Киргизийн Алмаз Сманбековыг 8'-8 харьцаагаар ялсан ч хагас шигшээд Хойд Солонгосын Чоншон Ханд 9-6 харьцаагаар ялагдсан. Улмаар хүрэл медалийн төлөө Японы Рин Сакамотог 5-1 харьцаагаар илүүрхсэн юм.

Зургийн эх сурвалж: UWW

• Азийн аваргаас Т.Энхжин мөнгө, З.Болортунгалаг хүрэл медаль авлаа
• Б.Мөнхнар, Б.Отгонтуяа, Э.Дэлгэрмаа нар Азийн аваргаас хүрэл медаль авлаа
• Чөлөөт бөхийн Азийн аваргад Монголын 23 бөх зодоглоно

65 кг жинд Цэвээнсүрэнгийн Цогбадрах эхний шатанд Хойд Солонгосын Кван Жин Кимийг 2'-2, шөвгийн наймд Казахстаны Нурсултан Садыкийг 10-2, хагас шигшээд Киргизийн Тайирбек Жумашбек Үүлүг 5-2 харьцаагаар тус тус ялж финалд шалгарсан бөгөөд финалд Японы Кайсэй Танабэд 12-2 харьцаагаар ялагдаж мөнгөн медаль авлаа.

Зургийн эх сурвалж: UWW

79 кг жинд Олонбаярын Сүлдхүү шөвгийн наймд Японы Рюносүкэ Камияаг 4-0 харьцаагаар ялсан ч хагас шигшээд Бахрейны Кидир Курбан Сайпудиновт 7-1 харьцаагаар ялагдсан. Улмаар хүрэл медалийн төлөө Киргизийн Арсалан Будажаповыг 4'-4 харьцаагаар ялсан байна.

Зургийн эх сурвалж: UWW

Мөн өдөр 70 кг жинд Төмөр-Очирын Тулга Энэтхэг, Хятадын бөхчүүдийг илүүрхэж хагас шигшээд шалгарсан ч Тажикистан болон Ираны бөхчүүдэд ялагдаж 5-р байр эзлэв. 97 кг жинд Ганбаатарын Ганхуяг 7-р байр эзэлсэн.

Чөлөөт бөхийн сүүлийн өдрийн барилдаанууд өнөөдөр үргэлжилж эрэгтэй үлдсэн таван жингийн барилдаанууд болно.