УИХ-ын ес дэх удаагийн сонгуульд МАН 126 суудлаас 68 суудал авч ялалт байгуулсан. Ээлжит сонгуулийн өмнө болсон МАН-ын Бага хурлын үеэр намын дарга, Ерөнхий сайд Л.Оюун-Эрдэнэ намын нөхдөдөө хандаж, “Хэрэв сонгуульд нам ялалт байгуулбал би намын дарга бөгөөд Ерөнхий сайдын албаа үргэлжлүүлэн хашна. Ялагдвал намын даргын албаа хүлээлгэн өгөх болно” гэдгээ мэдэгдэж, энэ шийдвэрийг Бага хурлын гишүүд 100 хувь дэмжсэн билээ.

Тэгэхээр ялалт байгуулсан намын дарга Засгийн газрын бүтэц, бүрэлдэхүүнийг баталж, кабинетын гишүүдээ томилох цаг ирлээ.

• Шинэ УИХ-ын даргаар ЗГХЭГ-ын дарга, Монгол Улсын сайд Д.Амарбаясгаланг томилох шийдвэрийг МАН-ын Удирдах зөвлөлөөс гаргажээ. 
• Мөн ЗГХЭГ-ын даргаар Ерөнхийлөгчийн тамгын газрын даргаар ажиллаж буй Я.Содбаатарыг
• Ерөнхийлөгчийн тамгын газрын даргаар УИХ-ын даргаас бууж буй Г.Занданшатарыг томилох тухай яригдаж байна.

Шинэ УИХ-д МАН ба бусад намын суудлын тоо 68:58-ын харьцаатай байгаа нь Засгийн газрын бодлого шийдвэрийг хэрэгжүүлэхэд кноп дутах, ажил явуулахад улс төрийн дэмжлэг дутах саад тотгор буйг Ерөнхий сайд Л.Оюун-Эрдэнэ юу эс андах вэ.

Тиймээс хамтарсан Засгийн газар байгуулах саналыг Парламентад суудалтай намуудад тавина гэсэн яриа эрх баригч намын түвшинд гараад буй юм.