УИХ-ын чуулганы нэгдсэн хуралдааны үеэр УИХ-ын гишүүн Б.Батбаатар бүлэггүй гишүүдийн саналыг хүлээн авахгүй байгаа талаар шүүмжиллээ.

Тэрбээр "УИХ-ын Тамгын газар манай гишүүдийн хүсэлтийг авалгүй орхиод байна. Парламент бол 126 гишүүн. Үндсэн хуулиараа ч тэр УИХ-ын тухай хуулиар ч тэр 126 гишүүнийг парламент гэдэг гээд заасан. Гэтэл олонх, цөөнхийн бүлэг л гэдэг юм яриад байдаг. Бусад нь парламентын гишүүн биш, нэг ёсондоо бүрэлдэхүүн биш аятай хандаад байна. Цаашдаа дэд хороо, Монголын парламентын бүлгэм гэх мэт ажлууд олонх, цөөнхөөр явж болохгүй.

Парламент таван нам, эвслийн төлөөлөлтэй. Уржигдар оролцсон УИХ-ын Төрийн байгуулалтын байнгын хорооны хуралд ч тэр ярьж байгаа өнцөг нь олонх, цөөнх. Олонх, цөөнх гэж үндсэндээ байхгүй шүү дээ. Нэг л том олонх болж байна шүү дээ. 126 гишүүний 118 нь хамтраад нэг бүлэг болж байна гэсэн үг. Тэгэхээр УИХ-ын тамгын газартаа анхааруулмаар байна. Бүлэггүй намын гишүүдийн саналыг хүлээн авмаар байна. Энэ асуудлыг тантай ярих гэж хоёр удаа өрөөнд очоод орж чадсангүй. Төрийн тусгай хамгаалалтынхан утсаа хураалга, биеэ нэгжүүл л гэдэг аятай хандаад байх юм" гэлээ.

УИХ-ын дарга Д.Амарбаясгалан "УИХ-ын Тамгын газарт шинээр баталсан дэгийг сайтар танилцуулж өгөхийг даалгаад "УИХ-д бүлэгтэй улс төрийн нам бүлгээрээ, бүлэггүй бол өөрийн биеэр, хүсэлтээр асуудалд хандах зохицуулалттай. УИХ-ын гишүүдэд нэгдсэн зар хүргэхэд УИХ-ын Тамгын газар онцгой анхаарч ажиллах нь зүйтэй. Нөгөө талаас гишүүд мөн анхаарч туслах, зөвлөхүүдээрээ дамжуулахыг хүсье. УИХ-ын гишүүн Б.Батбаатарын хүсэлтийг хангаж өгнө" гэлээ.

УИХ-ын гишүүн Б.Батбаатар нь Иргэний Зориг Ногоон Намын дарга бөгөөд тус намыг төлөөлөн парламентад суугаа дөрвөн гишүүний нэг.