Улаанбурханы өвчлөл дэгдэлт хэлбэрээр бүртгэгдэж буй Вьетнам улсад аялсан өгүүлэмжтэй улаанбурхан өвчний гурав дахь тохиолдол нийслэлд лабораториор батлагджээ.

Улаанбурханаар өвдсөн, 11 настай хүүхэд хамгийн халдвартай үедээ Гурвангал, Интермэд эмнэлэгт очсоны дараа ХӨСҮТ-д ирсэн байна.

Улаанбурхан нь вирусээр үүсгэгддэг, амьсгалын замаар халдварладаг. Уг өвчнөөр өвдөж байгаагүй, вакцинд хамрагдаагүй хүн бүр өвдөх боломжтой. Хүүхдүүд хүндрэх, эндэх эрсдэлтэй. Иймд ХӨСҮТ-ийн Вируст гепатитын тасгийн эрхлэгч, анагаах ухааны доктор Д.Оюунгэрэл дараах зөвлөгөөг өгөв.

Бүгд амны хаалтаа буцаад зүүх цаг ирлээ. Олон хүүхэд улаанбурханаар өвдөх тул эмч, эцэг эхчүүд дараах зүйлсийг анхаарна уу. Арьсан дээр тууралтгүй ч амны салстад бага арааны орчимд тууралт шар будаа шиг байгааг үзээрэй. Тууралт дээрээсээ доошоо шаталсан байдаг. Хүүхдэд ханиалгах шинж тэмдэг илрэхэд аль болох эрт А амин дэм өгнө. Мөн дархлаажуулалтад хамрагдаарай.