Энэ сарын 1-нээс эхэлсэн эрт илрүүлгийн хүрээнд 31-45 насныхан долоон төрлийн шинжилгээ өгнө. Иргэдийн нас ахих тусам илүү олон төрлийн шинжилгээнд жилд нэг удаа, үнэгүй хамрагдана.     

Халдварт бус өвчин, осол гэмтлийн шалтгаан, эрсдэлт хүчин зүйлийн тархалтын үндэсний IV судалгаагаар 15-69 насны гурван хүн тутмын нэг нь, 45-69 насны хоёр тутмын нэг нь халдварт бус өвчнөөр өвчлөх өндөр эрсдэлтэй байна.

Энэ эрсдэл эрэгтэйчүүдэд эмэгтэйчүүдийнхээс 1.5 дахин их байна. Манай улсад хөдөлмөрийн насны хүн амын өвчлөл, нас баралтын шалтгааны 77 хувийг халдварт бус өвчин эзэлжээ. Нас барсан гурван тохиолдол бүрийн нэг нэг нь зүрх судасны өвчний шалтгаантай байна.

Мөн хорт хавдрын өвчлөл, нас баралт жилээс жилд өсөх хандлагатай байна. 2010 онд хорт хавдрын 4466 шинэ тохиолдол, нас баралтын 3264 тохиолдол бүртгэжээ.

Харин 2020 онд шинэ тохиолдол 6702, нас баралтын тохиолдол 4260 болж өссөн байна. мөн шинэ тохиолдлын 73 хувийг хожуу оношилдог тул хорт хавдраар өвчилсөн хүмүүсийн 65 хувь нь онош тогтоолгоод нэг жилийн дараа нас бардаг.                 

Иймд хүн амыг урьдчилан сэргийлэх,эрт илрүүлэх үзлэг, шинжилгээ, оношилгоонд хамруулснаар хүний амь нас, амьдралын чанарт ноцтой хохирол учруулах, цаашид хөгжлийн бэрхшээл хүргэж болзошгүй хүндрэл, нас баралт, санхүүгийн дарамтаас сэргийлэх зорилгоор эрт илрүүлгийг зохион байгуулж байна.