Засгийн газрын ээлжит хуралдаан үргэлжилж байна. Төрийн өмчийн бодлого, зохицуулалтын газрын дарга Б.Цэнгэл мэдээлэл хийлээ. 

2024-2028 оны үндсэн чиглэлийн төсөлд төрийн өмчит 20 компани багтсан.  Эрдэнэт үйлдвэр, Эрдэнэс тавантолгой, Эрчим хүчний 11 компани, Миат, Төрийн банк, Хөдөө аж ахуйн бирж, корпораци зэргээс 10-66 хүртэлх хувийг Монголын болон гадаадын биржээр оруулж, хувьцааг нээлттэй болгох саналыг орууллаа.

Ингэснээр Төрийн өмчит компаниудаас 3.74 их наяд төгрөгийн орлого төвлөрүүлэх боломжтой гэж үзэж байна.

Тэрбээр, төрийн өмчит компаниудын засаглалыг сайжруулж, үр өгөөжийг нэмэгдүүлэх хүрээнд нэр бүхий 17 компанийг цөөлөх, 9 компанид бүтцийн өөрчлөлт хийн, татан буулгаж, нэгтгэх саналыг Засгийн газарт танилцуулсан.

Төрийн өмчит компаниуд толгой болон охин компаниудтайгаа нийлээд нийт 109 байсныг 87 болгон цөөлөх төлөвлөгөөтэй байна. Давхацсан чиг үүрэгтэй газруудын давхардлыг арилгана. 

Төрийн өмчит компанийн захирлуудын цалин хангамжийн шударга бус хуваарилалтын асуудлыг хөндлөө.  Үйл ажиллагааны үр дүн, компанийн ашиг орлогод нийцсэн цалин урамшууллын системийг хэрэгжүүлэх ёстой гэж үзэн олон улсын байгууллагуудтай хамтран аргачлал боловсруулж байна. Дараагийн хуралд эцсийн байдлаар танилцуулна.

Судалгаа хийхэд хамгийн өндөр нь сарын 30 сая төгрөгийн цалин авч байна. Тухайлбал Эрдэнэс Монгол, Эрдэс таван толгой, Хөдөө аж ахуйн бирж, Миат зэрэг ТӨК-ийн захирлуудын цалин  улс, төрийн өмчит компани, салбарын дунджаас өндөр байна. Харин Монгол шуудан, Монгол кино нэгтгэл, Үндэсний шигшээ багийн бэлтгэл сургуулилтын төвийн захирлын цалин 940-1 сая 300 мянган төгрөг байна гэв.