Эрчим хүчний салбарын хөгжил, реформын судалгааны дунд шатны тайлангийн хэлэлцүүлэг өнөөдөр болж, салбарын шинэчлэлийн чиг хандлага болон тулгамдсан асуудлыг хэлэлцлээ.

Эрчим хүчний яам Азийн хөгжлийн банкны (АХБ) санхүүжилтээр салбарын зах зээлийн үнэлгээ хийлгэж, Гүржийн зөвлөхүүд зургаан чиглэлээр дүгнэлт гаргасан байна. Үүнд зах зээлийн давуу болон сул тал, олон улсын хөгжлийн харьцуулалт, үнэ тарифын аргачлал, дамжуулах болон түгээх сүлжээний үйл ажиллагаа багтжээ.

УИХ-ын гишүүн М.Энхцэцэгийн хэлснээр, эрчим хүч эдийн засгийг боомилсон салбар болоод удсан тул өрсөлдөөнд суурилсан цахилгаан эрчим хүчний загварт үе шаттай шилжих шаардлагатай. Эхний шатанд эх үүсвэрийн өрсөлдөөн бий болгож, дараа нь хангах үйлчилгээг зах зээлд нэвтрүүлэх, цаашлаад бүрэн өрсөлдөөнт тогтолцоонд шилжих боломжтой гэлээ.

Түүнчлэн Монголын жижиг зах зээлд 20-иод түгээх компани ажиллаж байгаа нь эдийн засгийн хувьд үр ашиггүй тул нэгтгэх, диспетчерийн төвийн давхардлыг арилгах, төрийн өмчит компанийн тодорхой хувийг хувьчлах зэрэг бүтцийн өөрчлөлт хийх шаардлагатайг онцоллоо.

АХБ 2025 оны гуравдугаар сараас эхлэн техникийн туслалцаа үзүүлж, тарифын болон үйлдвэрлэлийн өртгийн загварчлал боловсруулсан бөгөөд “Монголын эрчим хүчний салбарын шинэчлэл, хөгжил" төслийн хүрээнд стратегийн болон үйл ажиллагааны төлөвлөгөө гаргахаар ажиллаж байна.

АХБ-ны эрчим хүчний мэргэжилтэн, төслийн удирдагч Серик Жаркинбаевын хэлснээр, Монголын эрчим хүчний салбарын хамгийн том бэрхшээл нь өгөгдөлд суурилсан шийдвэр гаргалт дутмаг, системийн төлөвлөлт тархай бутархай, дата мэдээллийн найдвартай байдал хангалтгүй байгаа явдал юм. Энэ нь зөвлөгөө өгөх, шийдвэр гаргах үйл явцыг хүндрүүлж буй тул хууль эрх зүйн шинэчлэл зайлшгүй шаардлагатай гэв. Тэрбээр найдвартай дата мэдээллийн систем бүрдвэл салбарын бүх шийдвэр бодит өгөгдөл дээр тулгуурлах боломжтой болно гэв.

Мөн тарифын зохицуулалтыг бодит өртөгт тулгуурласан, урамшууллын тогтолцоонд шилжүүлэх, сэргээгдэх эрчим хүчний холболтын нөхцөлийг сайжруулах, Эрчим хүчний зохицуулах байгууллагын чадавхыг нэмэгдүүлэх шаардлагатайг дурдав.

Азийн хөгжлийн банкны хэрэгжүүлж буй 500 мянган ам.долларын төсөвтэй уг төсөл 2025 оны арваннэгдүгээр сарын 25-нд дуусах аж.