Ерөнхий сайд Г.Занданшатар Сэлэнгэ аймгийн Ерөө суманд ажиллаж, газар тариалан эрхлэгчдийн төлөөлөлтэй уулзжээ

Уулзалтын үеэр тариаланчид энэ зун газар тариалангийн дийлэнх бүс нутагт хур бороо багатай, гандуу байсан учраас ургац алдах нь тодорхой болсон. Тиймээс урт хугацаатай хөнгөлөлттэй зээл олгох, ургац хадгалах, борлуулахад бодлогын дэмжлэг хэрэгтэй байгаагаа илэрхийллээ. 

Энэ жил хөдөө аж ахуйн салбарт 800 тэрбум төгрөгийн хөнгөлөлттэй зээл олгосон байна.  Цаашид зээлийг ашиглалт сайтай хэсэг рүү шилжүүлэх зохицуулалт хийнэ. Тариалангийн талбайн хэмжээг нэмэгдүүлэх асуудлыг аймгийн ИТХ-д хэлэлцүүлж, Засгийн газрын хуралдаанд танилцуулж шийдвэрлүүлэхийг Ерөнхий сайд тариаланчдад хэлжээ.

Салбарын яамны үзэж буйгаар тариалангийн талбайг 200.000 га-аар нэмэх шаардлагатай байгаа аж.

Мөн тариалангийн бүс нутагт 2025 оны 10 дугаар сарын 25-ныг хүртэл тариалангийн талбайн захаас гадагш 500 метрийн зайд мал бэлчээхгүй, оторлож өвөлжөөндөө буухгүй байх журмыг сумдын засаг дарга нарт чанд сахиулахыг Ерөнхий сайд анхааруулжээ.