Google компанийн албан ёсны эрхтэй “Grow with Google Mongolia” тэтгэлэгт хөтөлбөрийн 2025 оны элсэлтийн хаалтын ёслол өнгөрөгч Даваа гарагт, TCI төвд байрлах Ballroom ZU-д боллоо. 

Соёл, спорт, аялал жуучлал, залуучуудын яам, Go Lab, Гүнд Инвестмент Холдинг ХХК, Монгол Улсын Үндэсний номын сан, Мэдээлэл технологийн үндэсний парк, ЦойлогсоZ залуусын коммьюнити нар хамтран зохион байгуулсан “Grow with Google Mongolia” хөтөлбөрийн хаалтын үйл ажиллагаанд тэтгэлэгт хөтөлбөрт хамрагдахаар хүсэлт гаргасан 2,000 гаруй залуусаас шалгарч, гурван сарын турш танхимаар хичээллэж, хөтөлбөрт хамрагдсан 350 залуус, 2024 оны  төгсөгчид, төр, хувийн хэвшил, олон улсын байгууллагын төлөөлөл хүндэт зочид хүрэлцэн иржээ. 

Хаалтын үйл ажиллагааны үеэр Google компанийн Монгол дахь суурин төлөөлөгч Э.Өсөхбаяр хөтөлбөрийн үр дүнг, хөтөлбөрийн төслийн менежментийн ангийн багш Ж.Батчимэг, цахим аюулгүй байдлын ангийн багш У.Ганбаяр, ахисан түвшний их өгөгдлийн шинжилгээ ангийн багш Ж.Болор, UX дизайн ангийн багш М.Дөлгөөнбаяр, дижитал маркетинг ба цахим худалдаа ангийн багш М.Тэмүүлэн, мэдээллийн технологийн автоматжуулалт ангийн багш Б. Мөнх-Эрдэнэ нар тус тус гурван сарын сургалтын онцлох үр дүнгээ танилцуулсан байна.

Батламж гардуулах ёслолын үйл ажиллагааг УИХ-ын гишүүн, Засгийн газрын гишүүн, Соёл, спорт, аялал жуулчлал, залуучуудын сайд Ч.Ундрам нээж, “Та бүхний боломж нээлттэй байгаа тул авсан мэдлэг, ур чадвараа ашиглан хязгааргүй амжилтад хүрээрэй.

Ирээдүйд та бүхэн эх орноо хөгжүүлж, дэлхийд манлайллаа харуулна гэдэгт итгэлтэй байна. Суралцаж хөгжих их үйлсэд тань амжилт хүсье хэмээн залуучуудад урмыг үг хэлсэн билээ.

“Grow with Google Mongolia” хөтөлбөрийн 2024 оны төгсөгч О.Элбэгмөрөн “Бүгд Найрамдах Өмнөд Судан” улсад энхийг сахиулах алба хааж байх хугацаандаа “Дижитал маркетинг ба цахим худалдаа”-ны ангийг амжилттай төгсөж, үргэлжлүүлэн сурсан чиглэлээрээ амжилттай карьер эхлүүлсэн тухай өөрийн түүх болон, хөтөлбөрт нэгдсний дараах амьдралын шинэ өөрчлөлтийн туршлагыг хуваалцаж нь олон залуучуудад  урам зориг эрч хүч өгсөн.

Ийнхүү 350 оролцогчид “Grow with Google Mongolia” хөтөлбөрөөс албан ёсоор гэрчилгээ гардан авч, баярт мөчөө хамтдаа тэмдэглэлээ. 

Энэхүү арга хэмжээний нэгэн онцлох хэсэг нь “Дэлхийн технологийн давалгаанд залуус хэрхэн бэлэн байх вэ?” сэдвээр өрнөсөн хэлэлцүүлэг байв. Панел хэлэлцүүлэгт Google компанийн төлөөлөл, Meta, OpenAI, Tik Tok, Roblox компанитай хамтарч ажиллаж буй Faro Group, Apple Pay, Android Pay шийдлийг Монголд нэвтрүүлж буй Bonum, Infinite Solutions зэрэг компаниудын төлөөлөл оролцож, технологийн салбарын шинэ чиг хандлага, залууст бий болж буй боломж, бэрхшээлүүдийн талаар санал бодлоо хуваалцсан байна. 

Мөн “Grow with Google Challenge” гарааны бизнесийн уралдааны шилдгүүд тодорч, 

• 3-р байрт Growgle баг “TenAI” буюу тендерийн процессыг автоматжуулах ухаалаг системээрээ, 
• 2-р байрт Ligmap баг “Phyto Dock” буюу байгалийн нэгдлүүдэд суурилсан эмийн судалгааны веб платформоороо, 
• 1-р байрт TEAM 0 баг “Memo” буюу гар бичмэл зурвасаар сэтгэл хөдлөлөө хуваалцах GenZ аппликэйшн төслөөрөө тус тус шалгарсан байна. 

Түүнчлэн зохион байгуулагчид хамтран ажилласан Соёл спорт, аялал жуулчлал, залуучуудын яам, Гүнд Инвестмент Холдинг, Монгол Улсын Үндэсний номын сан, IT Park, ЦойлогсоZ залуусын коммьюнити болон бусад түнш байгууллагуудад талархал илэрхийлсэн юм.

Хаалтын үйл ажиллагаа уран бүтээлчдийн тоглолт, оролцогчдын networking зэрэг сонирхолтой хэсгээр үргэлжилж, шинэ мэдлэг ур чадвар эзэмшсэн залуус баярт мөчөө хамтдаа хуваалцлаа.