ОХУ-ын иргэн Андрей Ожаровск нь Дорноговь аймгийн Улаанбадрах сумын нутаг дахь "Зөөвч-Овоо" орд, Дорнод аймгийн "Мардай" ордод очиж цацрагийн хэмжилт хийсэн тухай мэдээлэл цахим орчинд цацагдсан. Гадаадын иргэний үйл ажиллагаатай холбоотой асуудлыг Гадаадын иргэн харьяатын газар болон хууль, хяналтын байгууллагууд шалгажээ.

Энэ талаар АҮЭБ-ийн сайд Г.Дамдиннямаас сэтгүүлчид өнөөдөр /2025.08.27/ тодруулахад, Аяллын визээр орж ирээд, Монгол Улсын газар нутаг дээр ямар нэг судалгаа, шинжилгээний ажил явуулах нь эрүүгийн гэмт хэргийн заалттай. Энэ асуудлыг ХЗДХЯ-нд тавьж, шалгуулсан.

Тус яамнаас өгсөн мэдээллээр ГИХГ болон бусад байгууллага хамтран ажиллаж, гадаадын иргэнийг 8-р сарын 25-нд Монгол Улсаас албадан гаргасан. Ийм асуудал давтагдах ёсгүй. Үүнийг тусгаар тогтносон улсын дотоод асуудалд хууль бусаар оролцож буй үйлдэл гэж болно гэв.