АНУ-ын ерөнхийлөгч Дональд Трамп пүрэв гарагт ОХУ-ын ерөнхийлөгч Владимир Путинтэй утсаар ярьж, "маш үр дүнтэй" яриа болсныг онцлов. 

Үр дүнд талууд Унгар улсад биечлэн уулзахаар болсныг мэдэгдлээ. 

Энэ яриа нь талууд өнгөрсөн наймдугаар сард Аляскад биечлэн уулзсанаас хойших анхны харилцан яриа болов. 

Кремлиэс төрийн тэргүүнүүдийн яриаг "маш илэн далангүй" болсныг онцлоод уулзалтын бэлтгэл ажилд шууд орохоо мэдэгджээ. 

Өнөөдөр буюу баасан гарагт Украины ерөнхийлөгч Володимир Зеленський Вашингтонд айлчилж буй. Трамп Зеленськийтэй уулзмагцаа Путинтэй ярьсан ярианы талаар түүнд мэдээлэл өгнө гэдгээ онцолсон байна. 

Трампын мэдээлснээр талууд хоёр долоо хоногийн дотор уулзах аж. 

Үүнтэй зэрэгцэн АНУ-ын талаас алсын тусгалт Tomahawk пуужинг Украинд нийлүүлэх эсэх талаар яриа өрнөж буй. 

Харин Путинтэй ярьсны дараа Трамп энэ асуудалд "АНУ нөөцөө шавхаж болохгүй. Бидэнд өөрсдөд ч хэрэгтэй...Тиймээс яг яахыг одоохондоо мэдэхгүй байна" хэмээн ярьжээ. 

Зеленськийн хувьд Tomahawk пуужингийн яриа гарч эхэлсэн тул Путин хөдөлж эхэлсэн хэмээн байр сууриа илэрхийлсэн байна. 

Энэ пуужинг Укрианд нийлүүлбэл Москва хүртэлх зайд асуудалгүй довтлох боломжтой болно гэж үзэж буй. 

Эх сурвалж: ВВС