УИХ-ын даргын дэргэдэх зөвлөл баасан гарагт хуралдаж, ирэх долоо хоногт хэлэлцэх асуудлын тов, дарааллыг баталжээ. Уг тов, дараалалд өнгөрсөн баасан гарагт УИХ-ын Төрийн байгуулалтын байнгын хорооны хурлаар хэлэлцэж эхэлсэн "Ерөнхий сайдыг огцруулах саналыг" оруулаагүй нь анхаарал татаж, сайтууд өнөөдөр онцлон мэдээлэв.

Үүнтэй холбоотойгоор өнөөдөр Улсын Их Хурлын Зөвлөл өнөөдөр хуралдаж, тов дараалалд өөрчлөлт оруулах болсныг мэдэгдэж тодруулга гаргажээ. 

Тодруулгад, 
УИХ-ын Тамгын газраас 2025 оны 10 дугаар сарын 13-17-ны өдрийн Улсын Их Хурлын чуулганы хуралдааны тов, дараалал нь 2025 оны 10 дугаар сарын 10-ны Баасан гарагийн үдээс өмнө /11.45 цагт/ батлагдсан.

Харин мөн өдрийн 14.00 цагт эхэлсэн Төрийн байгуулалтын байнгын хорооны хуралдаан ирэх Даваа гараг /2025.10.13/-т үргэлжилж Ерөнхий сайдыг огцруулах саналыг хэлэлцэх болсон тул Улсын Их Хурлын Зөвлөл өнөөдөр хуралдаж ирэх долоо хоногийн чуулганы хуралдааны тов, дараалалд өөрчлөлт оруулна гэжээ.