УИХ-ын Боловсрол, шинжлэх ухааны дэд хорооноос зохион байгуулсан “Шинжлэх ухааны салбарын өнөөгийн нөхцөл байдал, цаашдын хөгжлийн бодлого, төлөвлөлтийн талаар санал солилцох уулзалт /2026.01.12/ болов.

Уулзалтад УИХ-ын ХХНББХ, Боловсрол, шинжлэх ухааны дэд хорооны гишүүд, Эдийн засаг, хөгжлийн яам, Шинжлэх ухааны академи, салбарын хүрээлэнгүүдийн эрдэмтэн, судлаачдын төлөөлөл оролцжээ.

Шинжлэх ухааны академийн Ерөнхийлөгч С.Дэмбэрэл салбарын өнөөгийн нөхцөл байдал, тулгамдсан асуудал, гарц шийдлийн талаар илтгэл тавьж, санхүүжилт, судлаачдын цалин хангамж, судалгааны багаж, тоног төхөөрөмжийн хүрэлцээний асуудалд анхаарал хандуулах шаардлагатайг онцоллоо.

Эдийн засаг, хөгжлийн яамны Шинжлэх ухаан, технологийн бодлого, төлөвлөлтийн газрын дарга Б.Мөнхтөр Монгол Улсын шинжлэх ухаан, технологи, инновацын салбарын судалгаа, хөгжүүлэлтийн зардал одоогоор дотоодын нийт бүтээгдэхүүний 0.13–0.15 хувийг эзэлж байгааг мэдээлэв.

Тэрбээр 2030 он гэхэд уг үзүүлэлтийг хоёр хувьд хүргэх, дэлхийн инновацын индексийн байрлалыг 78-аас 50 болгон ахиулах зорилт дэвшүүлэн ажиллаж байна гэв.

Үндэсний шинжлэх ухаан, технологийн сангаас 2020–2025 онд нийт 5000 гаруй судалгаа, инновацын төслийг санхүүжүүлсэн талаар, эрдэмтэн судлаачдын судалгааны үр дүнг эдийн засгийн эргэлтэд оруулахад гүйцэтгэж буй үүргийг онцолсон мэдээлэл хийв.

Уулзалтын төгсгөлд оролцогчид шинжлэх ухааны салбарын бодлогын уялдаа холбоог сайжруулах, санхүүжилтийн тогтолцоог боловсронгуй болгох, судалгааны үр дүнг эдийн засгийн эргэлтэд оруулах чиглэлээр хамтран ажиллах шаардлагатай гэдэгт санал нэгджээ.

Эх сурвалж: ШУА