Япон Улсын буцалтгүй тусламжаар хэрэгжиж буй “Хүний Нөөцийг Хөгжүүлэх JDS Тэтгэлэгт Хөтөлбөр”-ийн магистрын 24 дүгээр ээлж, докторын 9 дүгээр ээлжийн оюутнуудыг хүлээн авч үдэх ёслол өчигдөр /2025.08.11/  Японы Элчин сайдын өргөөнд боллоо.

Энэ хөтөлбөр төрийн залуу албан хаагчдыг чадавхжуулах, эх орны ирээдүйн хөгжилд манлайлах боловсон хүчин бэлтгэх зорилготой. Өнөө жил Монгол улсаас 14 албан хаагч магистрантураар, нэг албан хаагч докторын хөтөлбөрт суралцахаар шалгарчээ.

Хүлээн авалтын үеэр Япон Улсаас Монгол Улсад суугаа Онц бөгөөд Бүрэн эрхт Элчин сайд Игавахара Масару энэ хөтөлбөрийн зорилгын талаар, “Нэгдүгээрт, Монгол Улсын нийгэм, эдийн засгийн ирээдүйн хөгжилд чухал үүрэг гүйцэтгэх төрийн залуу албан хаагчдад Японы их дээд сургуульд ахисан түвшний зэрэг хамгаалах боломж олгож, эх орныхоо хөгжилд хувь нэмрээ оруулахад нь туслах явдал юм. Хоёрдугаарт, хоёр орны иргэдийн дунд харилцаа холбоо тогтоон, Монгол Японы найрамдалт харилцааг улам бүр бэхжүүлнэ” хэмээн тайлбарлаад, тэнцэгчдэд баяр хүргэлээ.

Мөн Монгол Улсын Боловсролын сайд П.Наранбаяр, JDS хөтөлбөрийн төгсөгчид нь улс орныхоо тулгамдсан асуудлыг бодитоор харж мэдрээд, шийдэх арга замыг нь хайдаг, хариуцлага өндөртэй судлаач мэргэжилтнүүд байдаг. Тэд Монгол улсынхаа хөгжилд хувь нэмрээ оруулахын зэрэгцээ Япон Монгол хоёр орны хамтын ажиллагааны гүүр болж байна гэлээ.

JDS хөтөлбөрийн докторын 9 дүгээр ээлжийн тэнцэгч Б.Уранчимэг “Би Цөмийн энергийн комиссын ажлын албаны Цөмийн аюулгүй байдлын бодлогын газарт цацраг идэвхт хаягдлын менежментийн асуудлыг хариуцаж ажилладаг. Үүнд, манай орны хэмжээнд цацраг идэвхт хаягдал хаана үүсдэг, тэдгээр хаягдалд ямар шаардлага тавьж, ямар хууль эрх зүйн орчин бүрдүүлж мөрдөх ёстойг боловсруулах үүрэг багтана. Тиймээс байгалийн гаралтай цацраг идэвхт материалаас гарч буй хаягдлын аюулгүй байдлыг хангаж, зүй зохистой удирдах, бодлогын баримт бичиг боловсруулах чиглэлд мэргэшихээр зорьж байна” гэж өөрийн мэргэжлийг тайлбарлав.

JDS хөтөлбөрийн 24 дүгээр ээлжийн тэнцэгч М.Төрболд сэтгэгдлээ хуваалцан, Би Монгол банкны Зээлийн мэдээллийн төвийн хянан шалгагч мэргэжилтэй. Энэ хөтөлбөрт хоёр дахь жилдээ горилж, тэнцлээ. Хирошимагийн их сургуульд эдийн засгийн магистрын хөтөлбөрт суралцах гэж буйдаа баяртай байна гэв.

JDS хөтөлбөрийн 24 дүгээр ээлжийн тэнцэгч Э.Цэвэгмэд “Энэ хөтөлбөрт орон нутгаас оролцож байна. Би Өмнөговь аймгийн Хөдөлмөр халамж үйлчилгээний газар Хяналт шинжилгээ үнэлгээ хариуцсан мэргэжилтэн. Төрийн захиргааны албан хаагчдад зориулсан учраас манай орон нутгийн мэргэжилтнүүд горилбол хөтөлбөрт шалгарах бүрэн боломжтой юм байна” хэмээн ярилаа.

ЖАЙКА-ийн Монгол дахь  Төлөөлөгчийн Газрын Дарга Мияги Кэнсүкэ, Хүлээж авч буй Японы их сургуулиуд Монгол Улстай харилцаа холбоо сайтай, тодорхой мэдээлэлтэй байдаг. Тиймээс Монголын нийгэмд тулгарч буй асуудлын хүрээнд тулгуурлаж хичээлийн хөтөлбөрөө боловсруулдаг онцлогтой.

Дөрвөн жилд нэг удаа Монголын Засгийн Газар, Японы Засгийн Газар, ЖАЙКА хамтран аль салбарт хүний нөөцийн чадавхыг бэхжүүлэх талаар ярилцаж шийддэг. Одоогоор Макро эдийн засаг болон Тогтвортой эдийн засгийг хөгжүүлэх чиглэлд уялдуулж сургуулиудаа сонгосон.

Энэ жилийн оролцогчдоос тухайн хоёр чиглэлээр ажилладаг, төгсөж ирээд Монголын нийгмийн асуудлыг хэрхэн шийдэх талаар бодитой төлөвлөгөө боловсруулсан мэргэжилтнүүдийг сонгож, гурван үе шатаар шалгаруулсан хэмээн хөтөлбөрийн шалгаруулалтын талаар тайлбарлалаа.

"Хүний Нөөцийг Хөгжүүлэх JDS Тэтгэлэгт Хөтөлбөр" нь 1999 оноос эхлэлтэй ба өдгөө Зүүн Өмнөд Азийн орнууд зонхилсон, зорилтот 20 оронд хэрэгжиж, нийт 6,000 гаруй залуус хамрагдсан байна. Монгол улсад 2001 оноос хэрэгжиж эхэлснээр нийт 432 албан хаагч Япон улсад мэргэжил дээшлүүлжээ.

Э.Болор-Од