УИХ-ын чуулганы өнөөдрийн үдээс өмнөх нэгдсэн хуралдаанаар УИХ-ын Төсвийн байнгын хорооны даргаар Н.Наранбаатарыг сонгох асуудлыг хэлэлцэж байна. 

Монгол Улсын Их Хурлын тухай хуульд “Байнгын хороог Улсын Их Хурлаас нэг жилийн хугацаагаар сонгосон дарга тэргүүлнэ” гэж, мөн “Байнгын хорооны даргыг сонгохдоо Улсын Их Хуралд сонгогдон ажилласан хугацаа, туршлагыг нь харгалзан тухайн Байнгын хорооны гишүүдээс сонгох бөгөөд түүнийг улируулан сонгож болно” гэж заасан байдаг. 

Улсын Их Хурал дахь МАН-ын бүлгээс Улсын Их Хурлын гишүүн Н.Наранбаатарыг Төсвийн байнгын хорооны даргад нэр дэвшүүлсэн. 

Н.Наранбаатар нь: 

• 1974 онд төрсөн, эхнэр хүүхдүүдийн хамт амьдардаг.
• 1992 онд Өмнөговь аймгийн 10 жилийн 1 дүгээр дунд сургууль
• 1996 онд Цэргийн их сургууль
• 2011 онд АНУ-ын Калифорнийн Олон Улсын их сургуулийг төгссөн. Эдийн засаг, нягтлан бодогч мэргэжилтэй. 
• 1996-1998 онд Цэргийн их сургуульд багш, 1998-2002 онд Төрийн өмчийн хороонд мэргэжилтэн
• 2002-2004 онд Өмнөговь аймгийн татварын хэлтсийн дарга
• 2004-2009 онд Өмнөговь аймгийн Засаг даргын Тамгын газрын  дарга, 2011-2015 онд “Билэгт говь” ХХК-ийн гүйцэтгэх захирал
• 2016-2020 онд Өмнөговь аймгийн Засаг дарга
• 2020 оноос хойш Монгол Улсын Их Хурлын гишүүнээр хоёр удаа сонгогдон ажиллаж байна. Улсын Их Хурлын гишүүн Н.Наранбаатарын парламентад ажилласан байдал, боловсрол, мэдлэг, туршлага зэргийг харгалзан үзэж, Төсвийн байнгын хорооны даргад нэр дэвшүүлжээ.  

УИХ-ын гишүүд нэр дэвшигчээс асуулт асууж, үг хэлж байна. 



УИХ-ын гишүүн Ц.Сандаг-Очир, Төсвийн байнгын хорооны даргад нэр дэвшиж буй Н.Наранбаатар гишүүнийш дэмжиж байна. Төсвийн байнгын хорооны даргаар томилогдож байгаатай холбогдуулан ирэх долоо хоногт яаралтай Сангийн сайдын мэдээллийг сонсмооор байна. Улсын хэмжээнд төрийн байгууллагуудын үйл ажиллагаа, төсөв санхүү хүнд байдалд ороод байна. 2025 оны 11-р сарын гүйцэтгэлээр улсын төсвийн орлого, зарлага ямар байгаа юм? гэдгийг сонсож, Засгийн газар ямар арга хэмжээ авч буй талаар мэдээлэл авмаар байна.

Орон нутгийн төрийн байгууллагуудын удирдлагуудаас маш их мессэж ирж байна. 10, 11-р сараас хойш төрийн байгууллагуудад цалингаас өөр гүйлгээ хийж болохгүй, орон нутагт үйл ажиллагаа явуулахад маш хүнд болж байна. Цалингаа ч бүрэн бүтэн тавьж чадахгүй хэмжээнд хүрээд байна. Урамшуулал цалинг олгохгүй гэсэн мэдэгдэл ирсэн.

Төсөв ямар байдалд орсон талаар УИХ-ын гишүүдэд мэдээлэл байна уу? 2025 он дуустал бид яаж амьдрах юм. Шаардлагатай бол асуудлыг УИХ-аар авч хэлэлцэх асуудал үүссэн байна. 2025 онд тендерт шалгарсан компаниуд гүйцэтгэлийн санхүүжилтээ авч чадахгүй байна.

Сангийн яам, аймаг, нийслэлд гүйцэтгэлийн санхүүжилтээ нэхсэн компаниуд “боож үхэх” гэж байна. Аймаг, сум, нийслэл дүүргийн эмнэлгүүдэд эм тарианы хүрэлцээ дутагдаж, эмнэлгийн тусламж үйлчилгээ доголдож эхэлж байна. Ханиад томуу дэгдээд байна. Ийм байхад яаж ажил явуулах юм бэ? Тиймээс энэ асуудлыг УИХ анхааралдаа авах шаардлагатай. Одоо бүгд шинэ жилээр амтсгалж, их багагүй шинэ жил хийж байна гэв.

УИХ-ын дарга Н.Учрал, Чуулганы хуралдааны дараа УИХ-ын даргын зөвлөл хуралдана. Ц.Сандаг-Очир гишүүний саналыг даргын зөвлөлийн хурлаар ярья. Шаардлагатай бол УИХ-ын тогтоол санаачлахад анхааръя гэв.