Иргэн А.Пүрэврагчаа санаачлан төрийн өндөр албан тушаалтнууд зам хааж, хөдөлгөөнийг хязгаарлах давуу эрх олгодгийг зогсоох өргөдөл гаргаж, иргэдийн гарын үсгийг цуглуулж буй.

Тодруулбал, Монгол Улсын Үндсэн хуулийн 14-р зүйлийн 1 дэх хэсэгт “Хүн бүр хуулийн өмнө эрх тэгш байна” гэж заасан байдаг.

Өргөгдөл гаргагч "Тус заалт бодит амьдрал дээр хэрэгжихгүй байна. Өнөөдөр Улаанбаатар хотын түгжрэл иргэдэд цагаа үрэх, орлого алдах, эрүүл мэндийн үйлчилгээ авах боломж хязгаарлагдах, онцгой тохиолдолд амь насанд аюул учруулж болзошгүй хэмжээний ноцтой түвшинд хүрсэн.

Гэтэл улсын өндөр албан тушаалтнууд өөрсдийгөө түгжрэлд саатахгүй байх нөхцөлийг тээврийн цагдаагийн тусгай хамгаалалт, зохицуулалтаар шийдүүлж, бусад иргэдийг зам дээр түгжрэн хохирох байдалд үлдээж байна. Энэ нь шударга ёс, ардчилал, иргэний эрх тэгш байдлыг илт зөрчиж байна" гэж үзжээ.

Өргөдөл нь 100,000-аас дээш хүний дэмжлэг авсан тохиолдолд УИХ-ын холбогдох байнгын хорооноос хэлэлцэж, шаардлагатай бол хуулийн төсөл санаачлах юм.

Өнөөдрийн байдлаар тус өргөдлийг 5,988 иргэн дэмжиж гарын үсэг зуржээ. Саналын хугацаа нөгөөдөр буюу /2025.12.17/-ны 14:12 цагт дуусна.

Та өргөдөлд ЭНД дарж гарын үсгээ зурах боломжтой.