Гэрэл зургийг Д.Жавхлантөгс

Зочид буудалд амиа алдсан 13 настай охинтой холбоотой хэргийн шүүх хурал 09.30 цагт Баянзүрх дүүргийн Эрүүгийн хэргийн анхан шатны шүүхэд хаалттай эхэллээ. 

Өнгөрсөн нэгдүгээр сард Д.Жавхлан, М.Амарболд нарт холбогдох эрүүгийн хэргийн урьдчилсан хэлэлцүүлгийн шүүх хуралдаанаар нөхөн гүйцэтгэх боломжгүй мөрдөн шалгах ажиллагаа хийлгэх шаардлагатай гэж үзэн хэргийг прокурорт буцаасан юм.

2017 оны наймдугаар сарын 23-ны өдөр Баянзүрх дүүргийн 21 дүгээр хорооны нутаг дэвсгэрт үйл ажиллагаа явуулдаг “Очир” төвийн зочид буудлын өрөөнд 13 настай охин амиа алдсан.

Түүний амиа алдсан хэрэгт дээрх хоёр этгээдэд эрүүгийн хэрэг үүсгэж, сэжигтнээр саатуулаад байгаа юм.

Яг одоо шүүх хурал үргэлжилж буй бөгөөд хохирогч охины аав шүүх хуралд оржээ. Харин түүний ээж охиныхоо зургийг тэврэн шүүхийн гадаа хүлээж сууна. Мөн охины эмээ, өвөө, хамаатан садан, "Лантуу" бүлгэм, "Холун хатны үрс" ТББ болон охины ээжийн ажлын хамт олон хүчирхийллийн эсрэг байр сууриа илэрхийлэн уриа барин зогсож байна.
 

Шүүх хурал эхэлснээс хойш хоёр цаг өнгөрч байна. Хаалттай болж буй хуралд охины аав хохирогчийн хууль ёсны төлөөллөөр оролцож буй бөгөөд ээж нь шүүхийн гадаа хадганд боосон охиныхоо зургийг тэвэрсээр зогсож байна. 

С.Баясгалан: ОХИНЫ МИНЬ ХҮН ТАНИХГҮЙ БОЛТОЛ ЗОДСОН БАЛМАД ЭТГЭЭДҮҮДЭД ЯЛЫН ДЭЭД ХЭМЖЭЭ ОНООХ ЁСТОЙ

"Охин минь амьд байсан бол тавдугаар сард 14 нас хүрэх байлаа. Охиноо хараагүй, тэврээгүй, үнсээгүй арван сар өнгөрч байна.

Өнгөрсөн арван сарын хугацаанд хэрэг олон удаа буцсан. Хэргийн газраас сэжигтний зураг олдсон, өөрсдөө баригдсан. Нотлох баримт байсаар байтал өнөөдрийг хүртэл хэргийн үнэн мөнийг шийдүүлж чадаагүй байна.

Өнөөдрийн шүүх хуралд бид маш их итгэл найдвар тавьж байна. Хэргийг үнэн зөвөөр шүүнэ гэж найдаж байна. Охиныг минь хүн танихгүй болтол зодож, аминд нь хүрсэн балмад этгээдүүдэд Монгол Улсад мөрдөж буй хууль дүрмийн дагуу ялын дээд хэмжээ оноох ёстой. Ийм шийдвэр гарна гэж би итгэж байна. Охины минь нүүрний нэг тал чихэгдчихсэн байсан. (Уйлав) 

Охин минь даруу төлөв, ээж аавынхаа үгнээс гардаггүй хүүхэд байсан юм шүү дээ. Ийм сайхан үрээ араатны гарт алдсан эцэг эхийн сэтгэл ямар байх уу" хэмээн нулимс дуслуулан хэлж байна.

Шүүх хурал 13.30 цагийн үед 10 минутын завсарлага авч эргэн хурал эхэллээ. Завсарлагааны үеэр хохирогч охины өмгөөлөгч Р.Булгамаа, Г.Батбаяр нар мэдээлэл өглөө.

Г.Батбаяр: ҮХЛИЙН ШАЛТГААНЫГ ТОДОРХОЙЛСОН ДҮГНЭЛТ ХУДАЛ БАЙНА

Өмгөөлөгч Г.Батбаяр, “Эрүүгийн хуулийн 12.1.4 дэх хэсэгт бага насны хүүхдийг хүчиндэх, үүний улмаас хохирогч амь насаа алдсан бол гэж байгаа юм. Гэтэл хохирогч хүчиндсэний улмаас амь насаа алдаагүй шүү дээ. Хохирогч өөр шалтгаант зүйлсийн улмаас амиа алдсан. Архины хурц хордлогын улмаас хохирогч амиа алдсан гээд байна. Гэтэл хүзүү, уушги, гуя, цавь гээд маш олон газар цус харвасан. Архины цочмог хордлогод орсон хүний биеийн бүх хэсэгт цус харвадаг юм уу гээд маргаад байгаа юм. Шүүгдэгч нар цагаан хэрэгсэл цусанд будагдсан, шалан дээр литр орчим цус тунасан зэргийг хараагүй, мэдэхгүй л гээд байна. Энэ бүхний бурууг архи руу л чихээд байна. Тэгэхээр үхлийн шалтгааныг тодорхойлсон дүгнэлт худлаа байна, шүүгдэгчид зориуд, санаатайгаар хүний амь насыг хөнөөх буюу Эрүүгийн тухай хуулийн 10.1.2-т заагдсан хүндрүүлэх нөхцөлтэйгөөр бага насны хүүхдийг биеэ хамгаалах чадваргүй байхад нь алсан байна л гэж бид үзэж байгаа учраас бүх насаар нь хорих ялыг оноож өгөөч гэж шүүх бүрэлдэхүүнээс хүсэж байна” гэлээ.

Өмгөөлөгч Р.Булгамаа: БУУДЛЫН ЦАГААН ХЭРЭГСЭЛ ЦУСАНД БУДАГДСАН БАЙХАД, “МЭДЭХГҮЙ” ГЭЖ ХАРИУЛЖ БАЙНА, ЯМАР ХҮН ЧАНАРГҮЙ ЮМ БЭ

-Бид шүүх хуралд нарийн мэргэжлийн эмч нарыг гэрчээр оролцуулж байна. Хор судлалын хүрээлэнгийн туршлагатай эмч Юндэн нөхцөл байдалд маш тодорхой дүгнэлт хийсэн. Талийгаач охины ходоодноос 5.7 промил спирт илэрсэн. Энэ хэмжээний спирт нь хэдий хэмжээний архи ууснаар бий болох вэ гэдгийг мэргэжлийн үүднээс тайлбарласан. Ингэхэд 500-750 мл архи уусан үед гарах хэмжээ юм байна. Хэргийн газраас нэг архины шил олдсон. Тэгэхээр охин тэр их хэмжээний архийг уусан болж таарах гээд байгаа юм.

Бод доо 13 настай охин байтугай насанд хүрсэн хүн ийм хэмжээний архийг ганцаараа уух уу, уулаа гэж бодоход хэдий хэмжээний архийг уугаад дараагийн архийг уух чадвараа алддаг билээ. Тэгэхээр бид архины хордлогын улмаас амиа алдсан гэдэг дүгнэлтийг гаднын нөлөөтэй гэдгийг батлуулах гэж нарийн мэргэжлийн эмчийн дүгнэлтийг оруулсан. Уушгинд шингэн зүйл илэрнэ гэдэг нь гаднын нөлөөтэй, хүн амины гэмт хэргээ хаацайлах, зүй бусаар эзэмдэхийн тулд архийг хүчээр уулгасан гэдэг нь батлагдаад байгаа юм.

Сэжигтнүүд өөрсдийгөө өмгөөлж, өөрөө уусан, нэг мэдсэн бие нь хөшсөн байсан мэтээр ярьж байна

Гэмт хэрэг гарснаас хойш арван сарын хугацаанд мөрдөн байцаалт үргэлжилж, хэргийн учир нэлээн тодорхой болж байна. Гэмт хэргийг хуулийн дагуу, үнэн шударга шийдвэр гаргана гэдэгт итгэл төгс байна.

Шүүгдэгч нар талийгаач охиныг анхнаас нь буруутгасан. Нийгэмд гэм буруутай этгээдүүд хохирогчийг буруутгадаг. Архичин, биеэ үнэлэгч байсан, хүмүүжил төлөвшилгүй гэх мэтээр ханддаг. Яг л энэ байдал ажиглагдаж байна. Сэжигтнүүд өөрсдийгөө өмгөөлж, өөрөө уусан, нэг мэдсэн бие нь хөшсөн байсан мэтээр ярьж байна. Хамгийн эмгэнэлтэй нь охиныг хүчиндсэн, зүй бусаар бэлгийн харьцаанд орсон, шулуун гэдсэнд гэмтэл учруулсан, ихээхэн хэмжээний цус алдаж, буудлын цагаан хэрэгсэл маш их хэмжээний цусанд будагдсан байхад мэдэхгүй л гэж хариулж байна. Ямар хүн чанаргүй, ямар эмгэнэлтэй юм бэ. Аав нь биеэ барьж чадахгүй маш их уйлж байна. Аргаа бараад “13хан настай миний бяцхан охиныг архичин, хүмүүжилгүй гэж буруутгахыг битгий хичээгээч ээ. Тэр хүн хорвоод алга. Миний цэцэг цэврүү шиг охиныг буруутгахын төлөө ийм увайгүй, хүн чанаргүй өмгөөлөл битгий хийгээч” гэж хэлж байна шүү дээ. 

Охины амиа алдсан шалтгаан нь архины хордлого гэж гарсаныг ар гэрийнхэн болон өмгөөлөгч нар нь эсэргүүцэж байгаагаа илэрхийлэв. Хохирогч охины өмгөөлөгч нарыг ийн мэдээлэл өгөхтэй зэрэгцээд шүүгдэгч М.Амарболдын өмгөөлөгч С.Оюунцэцэг тайлбар өгөхийг хүссэн. Шүүгдэгч нарын ар гэр болон өмгөөлөгч нар өнөөдрийг хүртэл ямар нэг мэдээлэл, тайлбар хэлэхээс зайлсхийсээр ирсэн юм.

С.Оюунцэцэг: МИНИЙ ҮЙЛЧЛҮҮЛЭГЧ ХҮНД АВЛИГАЛ ӨГӨӨД БАЙХ ЧАДАЛТАЙ АМЬДРАЛТАЙ ХҮН БИШ

-Шүүхийн шийдвэр эцэслэн гараагүй. Хохирогчийн өмгөөлөгч шүүгдэгчийн өмгөөлөгч нарыг увайгүй гэж хэллээ. Өмгөөлөгч хүний ёс зүйн дүрэм гэж байдаг. Өмгөөлөгч хүн үйлчлүүлэгчийнхээ талд өмгөөлөл хийх ёстой. Би урд нь нэг ч удаа ярилцлага өгч байгаагүй. Р.Булгамаа өмгөөлөгчийн хэлсэн үгтэй холбогдуулж хэдэн үг хэлье гэж бодлоо. Хүний амь нас хохирч, үр хүүхэд нь өнгөрсөнд адилхан эх, эмээ хүний хувьд харамсаж байна. Гэхдээ би мэргэжлийнхээ үүргийг биелүүлж хүнээ өмгөөлж байна. Ингэж өмгөөлснийхөө төлөө увайгүйгээр дуудуулах ёсгүй. Энэ бол өмгөөлөгч хүний үүрэг. Монгол Улсын хуулиар иргэн хууль зүйн тусламж авч, өмгөөлөгч авах эрхтэй. Энэ дагуу өмгөөлөгч авсан. Манай үйлчлүүлэгч гэм буруугаа хүлээгээгүй биш хүлээсэн. Тодорхой хэмжээнд. Гагцхүү үхлийн шалтгаан нь хүчиндсэнээс болсон уу, архины хордлогоос болсон уу гэдгийг шүүх эцэслэн шийдвэрлэнэ. Өнөөдөр хүмүүсийн барьж ирсэн уриаг харахад “Шүүх эмнэлэг авлига авахаа зогсоо” гэсэн байна. Хэн өнөөдөр авлига авсан юм. Аливаа юм нотлох баримттай байх хэрэгтэй. Миний үйлчлүүлэгч хүнд авлигал өгөөд байх чадалтай амьдралтай хүн биш” гэсэн тайлбарыг өгсөн юм.

Түүний ингэж хэлсэнд охины ээж С.Баясгалан гомдож,

-Хичнээн хүнээ өмгөөлж болно. Гэхдээ бусдын нялх үр амиа алдчихаад байхад нэр хүндэд нь халдаж болохгүй. Миний хүүхдийг өнөөдөр архичин мэт ярьж байна. Яагаад ийм цэвдэг байгаа юм. Яагаад өөрсдийгөө өмөөрөөд байгаа юм. Удаа дараа архичин мэт ярьж нэр хүндэд нь халдаж, буруутгачихаад өмгөөлөгчийн ёс зүй ярьж болж байгаа юм уу. Ээж нь өнөөдөр хүүхдээ тэвэрч ч чадахгүй байна. Надад үнэхээр хэцүү байна. Миний хүүхэд, мах цусны минь тасархай газарт булагдчихсан байна. Тэгэхэд энэ хүн өөрийгөө өмгөөлөөд нүүр бардам ярилцлага өгөөд зогсож байгааг ойлгохгүй байна” хэмээн уйлж байв.

13 настай охины амиа алдсан хэргийн шүүх хурал 09.40 цагт эхэлсэн. Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн Тамгын газраас шүүхийн шийдвэрийг танилцууллаа. 

Шийдвэрийг бүрэн эхээр нь хүргэж байна. 

-Баянзүрх дүүргийн Эрүүгийн хэргийн анхан шатны шүүх Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1.2-д “шүүх хуралдаанаар нөхөн гүйцэтгэх боломжгүй мөрдөн шалгах ажиллагааг хийлгэх” гэх үндэслэлээр Д.Жавхлан, М.Амарболд нарт холбогдох эрүүгийн хэргийг мөрдөн шалган ажиллагаа хийлгэхээр прокурорт буцаасан.

Шүүгдэгч нар хохирогчид архи уулган согтоож, согтуурсны улмаас биеэ хамгаалах чадваргүй байгааг далимдуулан хурьцал үйлдсэн, улмаар хохирогч нь архины цочмог хордлогын улмаас нас барсан үйл баримт тогтоогдсон.

Шүүгдэгч нарыг хохирогч архины цочмог хордлогын улмаас амь нас хохирсонд гэм буруутай эсэх талаар мөрдөн шалган ажиллагаа явуулаагүй, тэдний үйлдлийг Эрүүгийн хуулийн зохих зүйл, хэсгээр зүйлчлэн ирүүлээгүй тул мөрдөн шалгах ажиллагаа хийлгэхээр шүүх хэргийг буцаасан.