Eruul.gerege.mn системийн сүүлийн хоёр сар орчим хугацааны төлбөрийг төлөөгүй тул өнөөдөр өглөөнөөс эхлэн ажиллахгүй байгаа юм.

Уг системээр дамжуулж иргэд шинжилгээ өгөх цаг авах болон шинжилгээний хариугаа хүлээн авдаг ч түр хугацаанд ажиллахгүй болсон бөгөөд үүнээс шалтгаалан өнөөдөр ЭМЯ эдгэрсэн болон хэвтэн эмчлүүлж байгаа хүмүүсийн тоог мэдээлэх боломжгүй болсныг хэлсэн.

Бид энэ талаар Онцгой байдлын ерөнхий газраас тодруулахад “Санхүүжилт тодорхой шалтгааны улмаас шийдэгдээгүй асуудал үүссэн. Өнөөдөр төлбөрийг шилжүүлэхээр ажиллаж байна. Тодорхой шат дараалалтайгаар санхүүжилтийг авдаг. Тиймээс “Гэрэгэ системс” ХХК-д үүсэн төлбөрийг өнөөдөртөө багтаан шилжүүлэх юм” гэлээ.

“Гэрэгэ системс” ХХК 2021 оны дөрөвдүгээр сарын 1-нээс эхлэн “ЭрүүлМН” системийг ашиглалтад оруулан Онцгой байдлын ерөнхий газар болон Халдварт өвчин судлалын үндэсний төвтэй гэрээ байгуулан ажиллаж эхэлжээ.

Онцгой байдлын ерөнхий газар систем ашиглалтын төлбөрөө нэг удаа төлсөн ба 4, 5 дугаар сарын төлбөрийг өнөөдрийг хүртэл буюу 55 хоног хэтрүүлсэн талаар “Гэрэгэ системс” ХХК-аас мэдэгдэл хүргүүлжээ.

Уг мэдэгдлийг Нийслэлийн эрүүл мэндийн газрын дарга Г.Бямбадоржид хаягласан бөгөөд үүнд “Гэрэгэ системс” ХХК түрээсийн өр, ажилтнуудад олгох цалингийн өр, нийгмийн даатгалын шимтгэл, татварын өр их хэмжээгээр хуримтлагдаж санхүүгийн маш хүнд байдалд орсон тухай дурдсан байна.