Коронавирусийн халдвар авсан ээжийг Нэгдүгээр амаржих газраас ХӨСҮТ рүү шилжүүлэхдээ эмч, мэргэжилтнүүд хүнлэг бус хандсан асуудлаар ЭМ-ийн сайд Т.Мөнхсайхан шуурхай хурал зарласан. Энэ хурлын дараа ЭМ-ийн сайд хотын дарга Д.Сумъяабазарт хандаж НЭМГ-ын дарга Л.Төмөрбаатар, Нэгдүгээр амаржих газрын дарга Г.Баясгаланд хариуцлага тооцож, албан тушаалаас нь чөлөөлөхийг хүсэж албан тоот хүргүүлсэн тухай бид мэдээлсэн.

Албан тоотын хариуд:
Нийслэлийн Засаг дарга Д.Сумъяабазар “Албан тушаалаас чөлөөлөхгүй, сануулга өгнө” гэсэн хариуг утсаар өгсөн гэж ЭМЯ-наас мэдээлэв. 

20.35 цаг: 
Хотын дарга Д.Сумъяабазар НЭМГ, 1-р төрөхийн дарга нарыг “ажлаас чөлөөлөхгүй” гэжээ гарчигтай мэдээ гарснаас хойш 15 минутын дараа Нийслэлийн Хэвлэл мэдээллийн албанаас манай редакц руу утсаар холбогдож "НЭМГ, 1-р төрөхийн даргыг ажлаас одоо чөлөөлөх гэж байна" хэмээн мэдэгдлээ. 

20.45 цаг: 
Нийслэлийн Засаг дарга Д.Сумъяабазар өөрийн томилсон албан тушаалтан тул НЭМГ-ын дарга Л.Төмөрбаатарыг албан тушаалаас нь чөлөөлөх захирамж гаргалаа. Харин 1-р амаржих газрын даргыг НЭМГ-ын дарга томилдог тул тус албан тушаалыг түр орлон гүйцэтгэж буй НЭМГ-ын дэд дарга Л.Зэндмаа тушаал гаргаж, 1-р амаржих газрын дарга Г.Баясгаланг албан тушаалаас чөлөөлсөн гэж Нийслэлийн Хэвлэл мэдээлэл, олон нийттэй харилцах хэлтсийн дарга Батмагнай мэдээлэв.