Өнгөрөгч долоо хоногт болсон үйл явдлын тоймыг хүргэж байна. 

Коронавирусийн дархлаажуулалт эхэлж, Ерөнхий сайд Л.Оюун-Эрдэнэ АстраЗенека вакцины АНХНЫ ТУНГ хийлгэсэн бол, Бүх нийтийн бэлэн байдлын зэргийг цуцалж, нийт ААН-ийн 95 хувь нь үйл ажиллагаа эхэлж, нийслэлчүүдийн амьдрал хэвийн горимд шилжсэн. Мөн тавдугаар сарын 1-нээс вакцинжуулалтад хамрагдсан иргэдэд хилээ нээх асуудлыг судалж үзсэн бөгөөд ирэх Лхагва гарагт болох Засгийн газрын хуралдаанд танилцуулна гэж Ерөнхий сайд Л.Оюун-Эрдэнэ хэлснийг онцлууштай. Мөн орон нутгийн сургуулиуд танхимаар хичээл орохоор болсон зэрэг үйл явдал өрнүүн долоо хоног болж өнгөрлөө.

ВАКЦИНЫГ ШУУРХАЙ АВАХАД ЕРӨНХИЙ САЙД АСАН У.ХҮРЭЛСҮХИЙН ХИЙСЭН ХЭЛЭЛЦЭЭР ЧУХАЛ БАЙЛАА

Ерөнхий сайд вакцин хийлгэхдээ "Монгол Улс улаан бүсээс шар бүсэд шилжиж байна. Нэг өрх нэг шинжилгээ өнөөдөр бид хаана байгаа, хаашаа явахыг заасан суурь боллоо. Хөл хорио болон шинжилгээгээр бид вакцинжуулалтын суурийг тавьж чадлаа. Ази тивдээ вакцинжуулалтыг эхлүүлсэн улсуудын нэг боллоо. Вакциныг ийнхүү шуурхай авахад Ерөнхий сайд асан У.Хүрэлсүхийн хийсэн яриа, хэлэлцээ чухал байлаа. Засгийн газар богино хугацаанд 18-аас дээш насны иргэдээ вакцинжуулах ажлыг шуурхай зохион байгуулна. Вакцинжуулалт сайн дурын үндсэн дээр явагдах хэдий ч цар тахлаас, аюулт өвчнөөс хамгаалах ганц арга нь вакцин гэдгийг хэлэх нь зүйтэй. 

Вакцинжуулалтын дараа 10 их наядын төлөвлөгөөг хэрэгжүүлнэ. Ажилчдаа вакцинжуулах тал дээр хувийн хэвшил Засгийн газартай хамтран ажиллаарай. Бид вакцин хийж чадвал хаагдсан зүйлсээ нээж чадна. Хаагдсан сургууль, хаагдсан бизнес, хаагдсан хилээ, хаагдсан аз жаргалтай амьдралын хэв маягийг зогсоож, хэвийн амьдралдаа шилжиж орно" гэсэн юм.

ЦЭРГИЙН АЛБА ХААГЧИД, ТЭДНИЙ ЭЦЭГ ЭХЭЭС УУЧЛАЛТ ХҮСЭВ

Цэргийн алба хаагчид нэгнийгээ дээрэлхэн, доромжилж буй видео бичлэг цахим орчинд тархан олон нийтийн бухимдлыг төрүүлэв. Зэвсэгт хүчний жанжин штабын Хэвлэл мэдээллийн албаны дарга, хурандаа Б.Отгонбаяр "Зэвсэгт хүчний 032-р ангид өнгөрсөн оны сүүлчээр цэргийн албан хаагчдын дунд дүрмийн бус харилцааны зөрчил гарсан. Зөрчлийн шалтгаан, үр дагаврыг тодруулахаар ажлын хэсэг ажиллаж байна. 2019 оны хоёрдугаар ээлжээр цэргийн албанд татагдан ирсэн дайчид 2020 оны нэгдүгээр ээлжээр татагдан ирсэн цэргүүдтэй харилцааны зөрчил гаргасан нь тогтоогдсон.

Ийм явдал болсонд хугацаат цэргийн алба хааж байгаа алба хаагчид, тэдний эцэг эхээс уучлалт хүсэж байна. Мөн халагдсан цэргийн алба хаагчид аймаг, дүүргийн харьяалалд байгаа тул болсон үйл явдлын шалтгааныг тодруулахаар хууль хүчний байгууллагатай хамтран ажиллана. 032-р ангид алба хааж байгаа цэргүүдийн ар гэр үйл ажиллагаатай нь танилцах боломжтой гэдгийг мэдэгдэж байна" гэлээ. 

"Цэргийн алба хаагч нь соёлч боловсон байж, албаны нэр хүндийг хамгаалах үүрэгтэй" бус уу гэдгийг иргэд асууж байна.

АТГ: БИЧЛЭГТ ДҮРС, ЗУРАГ НЬ ГАРСАН АЖИЛТАНГ АЖЛААС НЬ ЧӨЛӨӨЛЛӨӨ

“Шүүхийн шүүгч, АТГ-ын болон ҮАБЗ-ийн ажилтнуудын ёс зүйгүй бичлэг задарлаа” гэсэн гарчигтай бичлэгт гарсан Авлигатай тэмцэх газрын ажилтанг ажлаас нь чөлөөлөв.

2021 оны 2 дугаар сарын 20-ны өдөр цахим орчинд тарсан бичлэгт АТГ-ын ажилтны нэр дурдагдаж дүрс, зураг нь тавигдсан асуудалд тус газрын Аюулгүй байдал, дотоод хяналт шалгалт хариуцсан нэгжээс ажилтан, комиссар П.Чулуунбаатарт холбогдуулан албаны шалгалтыг хийсэн байна. 

Шалгалтын дүнг үндэслэн АТГ-ын Хяналт шалгалт, дүн шинжилгээний хэлтсийн Мэдүүлгийн бүрдүүлэлтийн албаны ажилтан, комиссар П.Чулуунбаатарыг 2021 оны хоёрдугаар сарын 24-ний өдрөөр тасалбар болгон үүрэгт ажлаас нь чөлөөлжээ.

П.Чулуунбаатар “Байгууллагынхаа албаны нэр хүндийг унагаж, олон нийтэд буруугаар ойлгогдох нөхцөл байдлыг бий болголоо, ёс зүйн хувьд цаашид ажиллах боломжгүй гэдгээ ухамсарлаж байна. Хамт олноосоо уучлалт хүсье” гэсэн байна.

П.Чулуунбаатар нь авлигын гэмт хэрэг шалгадаг мөрдөгч мэтээр мэдээлсэн нь ташаа бөгөөд Мөрдөн шалгах хэлтсийн мөрдөгчөөр ажиллаж байгаагүйг АТГ-аас мэдээлсэн. 

Вакцинтай холбоотой БҮХ МЭДЭЭЛЛИЙГ НЭГ ДОРООС

Манай улс энэ сарын 23-наас коронавирусийн вакциныг хийж эхэлсэн. Энэ талаар Та юу мэдэх ёстой вэ? Таны мэдэж болох бүх мэдээллийг бид багцлан хүргэж байна.

ВАКЦИНЖУУЛАЛТ ХЭЗЭЭ ЭХЭЛЖ, ХЭЗЭЭ ДУУСАХ ВЭ?

Вакцинжуулалт энэ сарын 23-нд буюу маргаашаас эхэлнэ. Хүн амын 60 хувийг вакцинжуулахад 2 тунгаар хийхэд 2021 оны 11-р сар гэхэд 2 сая гаруй иргэнээ бүрэн хамруулна гэсэн төлөвлөгөө гарсан талаар Эрүүл мэндийн сайд С.Энхболд мэдээлсэн юм. 

ЯМАР ТӨРЛИЙН ВАКЦИН МАНАЙ УЛСЫН ИРГЭД ХИЙЛГЭХ ВЭ?

Эхний ээлжинд Астразенека болон Файзер вакцинуудыг хийлгэнэ. Энэтхэгт үйлдвэрлэсэн Астразенека вакцины 150 мянган тунг хүлээн авсан. 

• Хятадын Синофарм 
• Оросын "Спутник V" вакцинуудыг оруулж ирээд байна. 

ХЭДЭН ТУН ВАКЦИН, ЯМАР ЗАЙТАЙ ХИЙЛГЭХ ВЭ

Вакцин бүгд хоёр тун хийх заалттай бөгөөд хоорондын хугацаа нь 21-28 хоног. Хоёр тун вакцин нэг үйлдвэрийнх байх ёстой.

ЯМАР ХҮМҮҮС ВАКЦИНЖУУЛАЛТАД ХАМРАГДАХГҮЙ ВЭ? 

• 18 нас хүртэлх хүүхдүүдийг
• Харшилтай хүмүүс
• Өндөр халуурч буй хүмүүс
• Халдварт өвчнөөр өвдсөн хүнд вакцин тарихгүй. 

​Бүрэн эмнэлгийн үзлэгт хамруулснаар тухайн иргэнд вакцин хийх эсэхийг шийдвэрлэнэ. Дэлгэрэнгүйг та энд дарж хүлээн авна уу.

АЖЛЫН БАЙРЫГ ДЭМЖИХ 3 ХУВИЙН ХҮҮТЭЙ ЗЭЭЛ ОЛГОЖ ЭХЛЭВ

Ажлын байрыг дэмжих жилийн гурван хувийн хүүтэй, гурван жилийн хугацаатай, эхний 12 сар хүртэл үндсэн төлбөрөөс чөлөөлөгдөх нөхцөлтэй зээл олгох ажил эхлээд байгааг Хүнс хөдөө аж ахуй, хөнгөн үйлдвэрийн яамнаас мэдээллээ.

Арилжааны банкаар дамжуулан олгох хоёр их наяд төгрөгийн зээлд хамрагдах аж ахуйн нэгж барьцаа хөрөнгө хүрэлцээгүй тохиолдолд Зээлийн батлан даалтын сангаар 60 хүртэлх хувийг батлан даалгах боломжтой. Барьцаа хөрөнгө хүрэлцээгүй тохиолдолд Зээлийн батлан даалтын сангаар 60 хүртэлх хувийг батлан даалгах боломжтой юм байна

Засгийн газраас "Эрүүл мэндээ хамгаалж, эдийн засгаа сэргээх 10 их наяд төгрөгийн цогц төлөвлөгөө"-г баталсан. Энэ арга хэмжээний хүрээнд Зээлийн батлан даалтын санд хандах аж ахуйн нэгж нь Жижиг, дунд үйлдвэр, үйлчилгээг дэмжих тухай хуулийн 4 дүгээр зүйлийн 4.1.1, 7 дугаар зүйлийн 7.1-д заасан шаардлагыг тус тус хангасан байх ёстой.

Арилжааны банканд хүргүүлсэн материалд үндэслэн жижиг, дунд үйлдвэр, үйлчилгээ эрхлэгч мөн эсэх тодорхойлолтыг Жижиг, дунд үйлдвэрийн газраас Зээлийн батлан даалтын санд уламжилна. Иймд жижиг, дунд үйлдвэр, үйлчилгээ эрхлэгчийн тодорхойлолт авахаар төрийн байгууллагад хандах шаардлагагүй болов.

Өнгөрөгч долоо хоногт нийтэлсэн онцлох ярилцлагуудыг хүргэж байна.

• Хичээлдээ явж, найз нөхөдтэйгөө тоглох нь хүүхэд стрессээс ангид байхад нөлөөлдөг
• ХУРЦ ӨНЦӨГ: "Эрдэнэтийн цагаан тоос" гарт баригдаж, аманд амтагдана
• Д.Оюунгэрэл: Сөрөг сэтгэл хөдлөлийг илэрхийлэхгүй удвал дараа нь илүү муугаар илэрнэ
• Ж.Алтантуяа: Өвчтөн, эмнэлгийн ажилчид эмнэлгээс халдвар авдаг байсныг бууруулах цогц төсөл үр дүнд хүрсэн
• "Хүүхдийн сурсан зүйлийг 24 цагийн дотор бататгахгүй бол тархи 75 хувийг нь мартдаг"
• "Эх орондоо ирэх эрхийг хязгаарласан шийдвэр дур зоргын шинжтэй байж болохгүй"