Цахим хөгжил, инновац, харилцаа холбооны сайд Ц.Баатархүү төр болон хувийн хэвшлийн бичсэн сайн кодыг гадаад улсад экспортлох замаар салбарын эдийн засгийг хөгжүүлэхээр төлөвлөж буй.  Тодруулбал, зургаадугаар сард батлагдсан “Мэдээллийн технологийн үйлдвэрлэлийг дэмжих тухай” хуульд “Төсвийн байгууллага өөрийн эзэмшиж буй программ хангамжийн эх кодыг гадаад улсад гэрээний үндсэн дээр ашиглуулж болно” гэж заажээ.

Энэ ч үүднээс e-barimt болон e-Mongolia системийг дэлхийн олон улс судлах, туршлага солилцох хүсэлтийг Цахим хөгжил, инновац, харилцаа холбооны яаманд Элчин сайдаараа дамжуулан илэрхийлээд байна.

Төр өөрийн эзэмшиж буй эх кодыг олон улсад экспортолж олсон орлогоороо мэдээллийн технологийн үйлдвэрлэлийг дэмжих виртуал бүсэд бүртгүүлсэн аж ахуйн нэгжид дэмжлэг үзүүлэхээр хуульд тусгажээ.

Дашрамд мэдээллэхэд, Монгол Улс нь харилцаа холбоо, мэдээллийн технологийг эдийн засгийн тэргүүлэх чиглэлийн нэгээр зарлаад байгаа бөгөөд тус салбар нь 2023 онд 2098.1 тэрбум төгрөгийн орлого олсноос 356.4 тэрбум төгрөгийг төсөвт төвлөрүүлжээ.