Төсвийн хөрөнгө оруулалтын тухай хуулийн төслийн үзэл баримтлалыг танилцуулах хэлэлцүүлэг Сангийн яаманд болжээ.

Улсын төсвийн хөрөнгө оруулалтаар 2016-2024 онд давхардсан тоогоор 9533 гаруй төсөл хэрэгжүүлж, 14.6 их наяд төгрөгийн санхүүжилт олгосон байна.

Жилд дунджаар 2500 гаруй ААН-тэй гэрээ байгуулж, 36 мянган ажлын байр тогтмол хадгалдаг. Төсвийн хөрөнгө оруулалтын явц, хэрэгжилт, үр дүнг дүгнэхэд зарим төсөл олон жил үргэлжилж, их хэмжээний нэмэлт санхүүжилт шаардаж, түүнээс үүссэн дийлэнх эрсдэлийг төр хариуцаж иржээ.

Улсын төсвийн хөрөнгө оруулалтаар төслүүдийг хэрэгжүүлэгчид нь хувийн хэвшлийнхэн. Энэ утгаараа хөрөнгө оруулалтын бодлого, шинэчлэл, цаашид хэрэгжүүлэх арга хэмжээний талаар хувийн хэвшлийн төлөөлөлтэй санал солилцжээ.

Сангийн яамны хөрөнгө оруулалт, хөгжлийн санхүүжилтийн газрын дарга Ж.Дэлгэржаргал “Төсвийн хөрөнгө оруулалтын тухай хуулийн үзэл баримтлал үндсэн таван зорилтод чиглэнэ” гэв. Эдгээр нь,

Нэгдүгээрт, гадаад зээл, улсын төсөв, орон нутгийн төсвийн хөрөнгө оруулалт зэргийг оновчтой хуваарилж, хөрөнгө оруулалтын үр ашгийн нэмэгдүүлж, төсвийн ачааллыг бууруулах,
Хоёрдугаарт, хөрөнгө оруулалтын төсөвт өртгөөс нь шалтгаалж таван түвшинд ангилах,
Гуравдугаарт, хөрөнгө оруулалтын техник, эдийн засгийн үндэслэл, зураг төсвийг ойлгомжтой, тодорхой болгох,
Дөрөвдүгээрт, хөрөнгө оруулалтын төлөвлөлтөөс эхлээд өмчийг бүртгэх, улмаар ашиглах хэмжээнд хүртэлх бүх үе шатуудыг тодорхой хуульчлах шаардлагатай байна.
Тавдугаарт, дижитал шилжилт буюу хөрөнгө оруулалтын үйл ажиллагаанд хиймэл оюун ухаан эх өгөгдлийг ашиглах зорилт тавьж байна гэв.

Төсвийн хөрөнгө оруулалтын тухай хуулийн үзэл баримтлалыг танилцуулсны дараа хөрөнгө оруулалтын бодлого, шинэчлэл, тулгамдаж буй асуудлын талаар хувийн хэвшлийнхэн санал, бодлоо илэрхийлсэн гэж Сангийн яамнаас мэдээлэв.