Хиймэл оюунд суурилсан Xplore дижитал инновацийн платформыг Мобиком Корпораци ХХК Сингапурт төвтэй “Circles” компанитай хамтран нэвтрүүлж байна. 

Хэрэглэгчдийнхээ амьдралын хэв маягт нийцсэн хэрэгцээтэй, сонирхолтой контентуудыг багтаасан энэхүү функцийг мобиком апп-д нэвтрүүлснийг одоогоор хэрэглэгчдийн тодорхой хэсэг туршиж эхлээд буй.

Мобиком апп-ын Xplore цэс нь:

• 80 гаруй төрлийн тоглоом;
• Үйл явдлын мэдээ, зурхай;
• Хурдан бичих сорил, асуулт хариулт, таавар зэрэг олон мини апп-ыг багтаасан.

“Мобиком Корпораци” ХХК-ийн Гүйцэтгэх захирал Кожи Курушима "Бид хэрэглэгчдэдээ  харилцаа холбооны үйлчилгээг хүргээд зогсохгүй, тэдний амьдралын хэв маяг, хүсэл сонирхолд нийцсэн бүхнийг санал болгож, дижитал хэрэглээг нь илүү үнэ цэнтэй байлгахыг зорьдог. Тиймээс моби апп-аасаа өдөр тутмын мэдээ, зурхай зэрэг хэрэгцээт мэдээллээ авч, тоглоом тоглож, асуултад хариулах зэргээр цагийг зугаатай өнгөрүүлэх боломж олгох Xplore функцийг туршиж эхлээд байна” хэмээлээ.

“Circles” компанийн Борлуулалт хариуцсан дэд захирал Санжай Каул “Бид Мобикомтой хамтран монгол хэрэглэгчдэд шинэ үйлчилгээг хүргэж байгаадаа баяртай байна. Xplore функц нь хүмүүсийн хүсэл сонирхолд нийцсэн, зугаатай, хэрэгтэй олон мэдээллийг өгч, тэдний дижитал хэрэглээг шинэ шатанд гаргана  гэдэгт итгэлтэй байгаа” гэв.

“Circles” нь Сингапур, Австрали, Японы зах зээлд дижитал инновацийн бүтээгдэхүүн, үйлчилгээг  хүргэж буй технологийн компани юм.