#Шатар 45 дахь удаагийн шатрын олимпиадын Долоодугаар өрөгт эмэгтэй шигшээ баг Германтай тэнцсэнээр 12-р байр руу ухарч, эрэгтэй баг Ливаныг хожсоноор 58-р байр руу дэвшлээ.

FIDE (The International Chess Federation)-аас зохиодог 45 дахь удаагийн шатрын олимпиад Унгарын нийслэл Будапешт хотод үргэлжилж байна.

Нэг өдөр завсарлаад байсан тэмцээний Долоодугаар өрөгт, оноогоор 7-р байрт жагсаж байсан Монголын эмэгтэй шигшээ баг Германы шигшээ багтай тоглож 2-2 харьцаагаар тэнцлээ.

• Эмэгтэй шигшээ багийн эхний хожигдол Гүржийн эсрэг байлаа
• Эмэгтэй шигшээ баг тавдугаар өрөгт АНУ-ыг хожсоноор 3-р байрт бичигдэж эхэллээ
• Шатрын эмэгтэй шигшээ баг Испанийг хожсоноор 7-р байр руу дэвшлээ

Эмэгтэй багаас тус өрөгт IM Даваадэмбэрэлийн Номин-Эрдэнэ бүтэн оноогоо авсан бол WGM Төрмөнхийн Мөнхзул, IM Батхуягийн Мөнгөнтуул туул нар тэнцэж, WCM Бат-Эрдэнийн Мөнгөнзул ялагдал хүлээсэн байна.

Ийнхүү эмэгтэй шигшээ баг 11 (18) оноотой 12-р байр руу ухрав. Тэдний дараагийн өрсөлдөгч нь мөн 11 оноотой 6-р байрт бичигдэж буй Арменийн шигшээ баг байх юм.

Харин эрэгтэй баг Долоодугаар өрөгт Ливаны шигшээ багтай тоглож 3-1 харьцаагаар хожлоо. Багаас FM Эрдэнийн Баасансүрэн, IM Мөнхдалайн Амилал, FM Хуягцогтын Итгэлт нар бүтэн оноогоо авч IM Ганзоригийн Амартүвшин ялагдсан байна.

Ингэснээр эрэгтэй баг 8 (16.5) оноотой болж 70-аас 58-р байр руу дэвшлээ. Тэд Наймдугаар өрөгт мөн 8 оноотой 78-р байрт жагсаж буй Панамын шигшээ багтай тоглоно.

Дэлхийн 197 орны тамирчид оролцож буй тэмцээний эрэгтэй төрөлд одоогоор Энэтхэг, Ираны шигшээ багууд тэргүүлж байна.