УИХ-ын чуулганы өнгөрсөн баасан гарагийн /2025.03.29/ нэгдсэн хуралдаанаар Монгол Улсын Ерөнхий сайд Л.Оюун-Эрдэнэ Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайлан болон Монгол Улсын хөгжлийн 2024 оны төлөвлөгөөний гүйцэтгэлийн тайланг танилцууллаа.

Энэ үеэр УИХ-ын гишүүд Ерөнхий сайд болон холбогдох сайд нараас улс орны нийгэм эдийн засаг болон тойрогтоо тулгамдсан асуудлуудыг дэвшүүлж, хариулт авсан юм.

УИХ-ын гишүүн У.Отгонбаяр, Сүүлийн 5-6 жилд жилдээ 500 орчим импортын адуу оруулж ирдэг. Импортоор адуу оруулж ирэхийг тодорхой хугацаанд хориглож болдоггүй юм уу? Тойрогтоо ажиллах үед энэ асуудлыг малчид маш ихээр тавьж байна. Жилдээ оруулж буй 500 адуу үржилд ороод, хэд болдог юм? Энэ талаар тодорхой тоо баримт байна уу?

Чуулганы танхимд ХХААХҮ-ийн сайд байгаагүй тул УИХ-ын дарга энэ асуултад Сангийн сайд хариулт өгөх үү? гэхэд Сангийн сайд Б.Жавхлан, “Туваан сайд моринд арай ойрхон хүн дээ” гэв.

Гэвч хариуцсан салбарын сайд нь байгаагүй тул УИХ-ын гишүүн У.Отгонбаярын асуулт хариултгүй үлдэв.