#Чөлөөтбөх 50 кг жинд Бямбасүрэнгийн Мөнхнар, 55 кг жинд Баянмөнхийн Отгонтуяа, 68 кг жинд Энхсайханы Дэлгэрмаа нар хүрэл медаль авлаа.

Чөлөөт бөхийн 2025 оны Азийн аварга шалгаруулах тэмцээн Йордан Улсын нийслэл Амман хотод үргэлжилж байна.

Тэмцээний сонгомол бөхийн барилдаанууд дуусаж өчигдөр эмэгтэй төрөл эхэллээ. Эмэгтэй чөлөөт бөхийн эхний өдрийн таван жингээс Монголын шигшээ баг гурван медаль авлаа.

Тодруулбал, 50 кг жинд Бямбасүрэнгийн Мөнхнар эхний шатанд Хятадын И Жангд 10-0 харьцаагаар ялагдсан. Харин И Жанг финалд шалгарснаар Б.Мөнхнар дагаж Шри Ланкагийн Нипуни Васанаг 5-0, Казахстаны Светлана Анкичеваг 3-0 харьцаагаар ялж хүрэл медаль хүртлээ.

• Чөлөөт бөхийн Азийн аваргад Монголын 23 бөх зодоглоно
• СПОРТЫН ЦАГЛАВАР: 2025 оны дөрөвдүгээр сар

Харин 55 кг жинд Баянмөнхийн Отгонтуяа эхний шатанд Өмнөд Солонгосын Хиерим Лиг 10-0, шөвгийн наймд Казахстаны Зулфияа Яахароваг 11-0 харьцаагаар ялсан. Улмаар хагас шигшээд Хятадын Юшиан Лид 10-0 харьцаагаар ялагдаж, хүрэл медалийн барилдаанд Энэтхэгийн Нишүг ялснаар медалийн тавцанд зогсов.

Тэгвэл 68 кг жинд Энхсайханы Дэлгэрмаа шөвгийн наймд Өмнөд Солонгосын Мижү Кимыг 9-0 харьцаагаар ялж хагас шигшээд Хойд Солонгосын Сол Гум Пакд 8-2 харьцаагаар ялагдсанаар хүрэл медалийн төлөө Киргизийн Гулнара Таштанбековатай барилдаж 14-2 харьцаагаар ялав.

Мөн 59 кг жинд Тогтохын Алтжин хүрэл медалийн төлөө Энэтхэгийн Мусканд ялагдаж 5-р байр, 76 кг жинд Энх-Амарын Даваанасан Японы Нодока Яамамотод ялагдаж 7-р байрыг эзлэв.

Өнөөдөр эмэгтэй үлдсэн таван жингийн барилдаан болох бөгөөд Монголын шигшээ багаас

1. 53 кг. Чинболдын Отгонтуяа
2. 57 кг. Хүрэлхүүгийн Болортуяа
3. 59 кг. Тогтохын Алтжин
4. 65 кг. Түвшинжаргалын Энхжин
5. 72 кг. Зоригтын Болортунгалаг нар барилдана.

Харин эрэгтэй чөлөөт бөхийн барилдаанууд нөгөөдрөөс эхэлнэ.

Зургийн эх сурвалж: UWW